ຮ່າງ ບົດກ່າວ

ຂອງ ທອງຫຼໍ່ ດວງສະຫວັນ  ຫົວໜ້າຄະນະບັນນາທິການ ໜັງສືພິມພາສາຕ່າງປະເທດຕໍ່ເວທີສົນທະນາໃນຫົວຂໍ້: Consumption Upgrading & Tourism Development” “ຍົກລະດັບການຊົມໃຊ້ ແລະ ການພັດ ທະນາການທ່ອງທ່ຽວ” ຢູູ່ “ກອງປະຊຸມສຸດຍອດສື່ມວນຊົນ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ” ໃນວັນທີ 3/7/2018 ທີ່ໂຮງແຮມດອນຈັນ ພາເລດ, ສ ປປ ລາວ.
- ຮຽນ ທ່ານ ສະຫວັນຄອນ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ
- ຮຽນ ບັນດາຜູ້ຕາງໜ້າເຈົ້າໜ້າທີ່ສື່ມວນຊົນຈາກອົງການສື່ມວນຊົນ 6 ປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ,
ທ່ານຍິງ ແລະ ທ່ານຊາຍ ທີ່ນັບຖືແລະຮັກແພງ,
ຂ້າ​ພະ​ເຈົ້າ​ຮູ້​ສຶ​ກ​ເປັນ​ກຽດ ແລະ ພາກພູມໃຈເປັນຢ່າງຍິ່ງ ທີ່ໄດ້ຮັບອະນຸຍາດໃຫ້ມານໍາສະເໜີ ແລະ ແລກປ່ຽນຄວາມຄິດຄວາມເຫັນ ໃນຫົວຂໍ້: "Consumption Upgrading & Tourism Development" ຢູ່ໃນເວທີສົນທະນາຂອງ “ກອງປະຊຸມສຸດຍອດສື່ມວນຊົນ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ” ໃນວັນນີ້.

ທ່ານຍິງ ແລະ ທ່ານຊາຍ ທີ່ຮັກແພງ!
1.ນະໂຍບາຍສົ່ງເສີມການທ່ອງທ່ຽວ:
ເມື່ອເວົ້າເຖິງການທ່ອງທ່ຽວແລ້ວໃຜໆກໍ່ມີມະໂນພາບທີ່ເຄີຍໄດ້ສໍາພັດຜ່ານຫຼາຍຊ່ອງທາງມາແລ້ວ ເຊັ່ນໄປເຫັນດ້ວຍຕົນເອງ, ເບິ່ງຢູ່ໂທລະພາບ, ໂທລະສັບ ຫຼື ອຸປະກອນສື່ສານຕ່າງໆ ແລະ ເພື່ອເປັນການສົ່ງ ເສີມການ ທ່ອງທ່ຽວ ລັດຖະບານລາວ ຖືເອົາການທ່ອງທ່ຽວເປັນໜຶ່ງໃນຂະແໜງຍຸດທະສາດທີ່ສໍາຄັນໃນການພັດ ທະນາເສດຖະກິດ-ສັງຄົມຂອງຊາດ ທັງສະເພາະໜ້າ ແລະ ຍາວນານ ໂດຍເລັ່ງໃສ່ການທ່ອງທ່ຽວທາງດ້ານວັດທະ ນະທຳ, ປະຫວັດສາດ ແລະ ທຳມະຊາດ ຕິດພັນຄຽງຄູ່ກັບການພັດທະນາບັນດາຂະແໜງການຕ່າງໆ, ເຊິ່ງເຮັດໃຫ້ການທ່ອງ ທ່ຽວລາວມີຫຼາກຫຼາຍສີສັນ, ມີ​ສ່ວນ​ຮ່ວມຈາກປະຊາຊົນ​ບັນດາເຜົ່າໃນ​ທົ່ວ​ສັງຄົມ ແລະ ກາຍເປັນອຸດສະຫະກໍາການທ່ອງທ່ຽວທີ່ຄົບວົງຈອນ, ທັນສະໄໝ ແລະ ຍືນຍົງ. ພ້ອມດຽວກັນນັ້ນ, ສປປ ລາວ ຍັງມີກົດໝາຍວ່າດ້ວຍການ ທ່ອງທ່ຽວໄດ້ຮັບການສ້າງຂຶ້ນແລະຮັບຮອງຈາກສະພາແຫ່ງຊາດປີ 2005 ແລະ ໄດ້ມີການປັບປຸງຄືນໃໝ່ປີ 2013.
2. ກິດຈະກໍາ, ການພັດທະນາ ພື້ນຖານໂຄງລ່າງ ແລະ ແຫຼ່ງທ່ອງທ່ຽວໃນໄລຍະຜ່ານມາ:
-ກິດຈະກໍາການທ່ອງທ່ຽວ:

ສ​ປ​ປ ລາວ​ ໄດ້​ຈັດ​ປີ​ທ່ອງ​ທ່ຽວ​ລາວຜ່ານມາແລ້ວ 2 ຄັ້ງ ຄື:​ປີ 1999-2000 ແລະ ປີ 2011-2012 ແລະນັບແຕ່ເວລານັ້ນເປັນຕົ້ນມາເຮັດໃຫ້ຈໍານວນນັກທ່ອງທ່ຽວເຂົ້າມາທ່ຽວລາວໄດ້ເພີ່ມຂຶ້ນຢ່າງຕໍ່ເນື່ອງ. ມາຮອດປີ 2015 ຈໍານວນນັກທ່ອງທ່ຽວໄດ້ເພີ່ມຂຶ້ນຫຼາຍກວ່າ 4,6 ລ້ານເທື່ອຄົນ ແລະ ລາຍຮັບຈາກການທ່ອງທ່ຽວໄດ້ກ້າວກະໂດດຂຶ້ນຫຼາຍກວ່າ 725 ລ້ານໂດລາສະຫະລັດ, ເຊິ່ງຈັດຢູ່ໃນລໍາດັບທີ່ 3 ຖັດຈາກລາຍຮັບການສົ່ງອອກຂອງລາວ.
ປີ 2017 ຈໍານວນນັກທ່ອງທ່ຽວເຂົ້າມາລາວ 3,868, 431 ເທື່ອຄົນ. ໃນນີ້ເປັນນັກທ່ອງທ່ຽວມາຈາກໄທຫຼາຍກວ່າໝູ່, ຮອງລົງມາແມ່ນຫວຽດນາມ, ຈີນ, ອາເມລິກາ, ຍີ່ປູ່ນ, ອັງກິດ, ເກົາຫຼີໃຕ້, ອົດສຕຣາລີ, ເຍຍລະມັນ ແລະ ມະເລເຊຍ ຕາມລໍາດັບ.
ສະເພາະປີທ່ອງທ່ຽວລາວ 2018 ນີ້ ຕາມແຜນການແມ່ນຈະພະຍາຍາມດຶງດູດນັກທ່ອງທ່ຽວເຂົ້າມາ ບໍ່ໃຫ້ຫຼຸດ 5 ລ້ານຄົນ ແລະ ສ້າງລາຍຮັບເຂົ້າມາໃຫ້ໄດ້ປະມານ 900 ລ້ານໂດລາ. ໃນ​ປີ 2020 ຄາດ​ຄະ​ເນຈະ​ມີ​ນັກ​ທ່ອງ​ທ່ຽວເຖີງ 6,2 ລ້ານຄົນ ແລະ ຈະ​ມີ​​ລາຍ​ຮັບເຖິງ 993 ລ້ານກວ່າໂດ​ລາ.
ໃນປີ 2016-2025 ອາຊຽນໄດ້ສ້າງແຜນຍຸດທະສາດ ການທ່ອງທ່ຽວຕາມວິໄສທັດທີ່ວ່າ: ໃນປີ 2025, ອາຊຽນຈະກາຍເປັນຈຸດໝາຍປາຍທາງການທ່ອງທ່ຽວທີ່ມີຄຸນະພາບ, ມີເອກະລັກສະເພາະ, ມີຄວາມຫຼາກຫຼາຍ ແລະ ເນັ້ນໃສ່ການພັດທະນາການທ່ອງທ່ຽວແບບມີຄວາມຮັບຜິດຊອບ, ມີຄວາມຍືນຍົງ, ມີສ່ວນຮ່ວມ ແລະ ເທົ່າທຽມກັນ ເພື່ອເປັນການປະກອບສ່ວນອັນສຳຄັນໃຫ້ແກ່ຄວາມຜາສຸກດ້ານເສດຖະກິດ-ສັງຄົມຂອງປະຊາຊົນອາ ຊຽນ.
- ການພັດທະນາ ພື້ນຖານໂຄງລ່າງ ແລະ ແຫຼ່ງທ່ອງທ່ຽວ
      ພື້ນຖານໂຄງລ່າງທາງດ້ານຄົມມະນາຄົມ: ລາວມີເສັ້ນທາງອອກສູ່ປະເທດເພື່ອນບ້ານ ໂດຍຜ່ານດ່ານສາກົນ 23 ແຫ່ງ, ໃນນີ້ 22 ແຫ່ງ ນັກທ່ອງທ່ຽວສາມາດເອົາວິຊາກັບດ່ານໄດ້ ແລະ ນອກນັ້ນຍັງມີນັກທ່ອງທ່ຽວຈາກ 19 ປະເທດໄດ້ຮັບການຍົກເວັ້ນວິຊາຕາມສັນຍາ, ລາວມີສະໜາມບິນສາກົນ 3 ແຫ່ງ ແລະ ຂະໜາດນ້ອຍ 6 ແຫ່ງ, ມີ 8 ບໍລິສັດການບິນ ແລະ ບິນ 18 ເມືອງ ໃນ 7 ປະເທດ.
ແຫຼ່ງທ່ອງທ່ຽວ: ອີງຕາມຖິຕິ ປີ 2017 ສປປ ລາວມີແຫຼ່ງທ່ອງທ່ຽວທັງໝົດ 2,104 ແຫ່ງ, ໃນນີ້ມີທໍາມະຊາດທັງໝົດ 1,194 ແຫ່ງ, ວັດທະນະທໍາ 628 ແຫ່ງ ແລະ ປະຫວັດສາດ 282 ແຫ່ງ. ປີ 2016 ລາວມີ ໂຮງແຮມ 545 ແຫ່ງ, ຣີສອດ ແລະ ບ້ານພັກ 2,452 ແຫ່ງ, ມີບໍລິສັດທ່ອງທ່ຽວ 381 ແຫ່ງ.
ເມືອງຫຼວງພະບາງ ໄດ້ຮັບຮອງເປັນເມືອງມໍຣະດົກໂລກຈາກ UNESCO ໃນປີ 1995, ວັດພູຈໍາປາສັກ ປີ 2001 ແລະ “ສຽງແຄນຄົນເຊື້ອຊາດລາວ” ເຊິ່ງເປັນມໍລະດົກດ້ານວັດທະນະ ທຳບໍ່ແມ່ນວັດຖຸຂອງມວນມະນຸດ ໄດ້ຮັບການຮັບຮອງຈາກ UNESCO ໃນປີ 2017.
ສປປ ລາວຍັງກະກຽມສົ່ງໃບສະເໜີໄປຍັງ UNESCO ເພື່ອຮັບຮອງເອົາພູຫີນໜາມໜໍ່ແຂວງຄໍາມ່ວນ, ທົ່ງໄຫຫີນແຂວງຊຽງ ແລະ ລໍາວົງລາວເປັນມໍລະດົກໂລກ.
ແຫຼ່ງທ່ອງທ່ຽວທີ່ມີຊື່ສຽງຂອງລາວໄດ້ແກ່ພະທາດຫຼວງວຽງຈັນ, ປະຕູໄຊ, ວັດສີສະເກດ, ຫໍພະແກ້ວ, ວັດຊຽງຄວນ, ທົ່ງໄຫຫີນຊຽງຂວາງ, ວັດຊຽງທອງ, ນໍ້າຕົກຕາດຄອນພະເພງ, ວັງວຽງ, ນໍ້າກັດ ຢໍລະປາ, ຖໍ້າຜູ້ນໍາຢູ່ເມືອງວຽງໄຊ. ນອກນັ້ນຍັງມີເທດສະການປະຈໍາປີເຊິ່ງດຶງດູດນັກທ່ອງທ່ຽວມາທ່ຽວຊົມເຊັ່ນ ບຸນທາດຫຼວງ, ບຸນວັດພຸຈໍາປາສັກ, ບຸນຊ້າງໄຊບະບູລີ, ບຸນບັ້ງໄຟ ແລະ ບຸນປີໃໝ່ລາວ.
ການພັດທະນາຊັບພະຍາກອນມະນຸດ ມະຫາວິທະຍາໄລແຫ່ງຊາດມີ ພາກວິຊາການທ່ອງທ່ຽວ​ແບບ​ອະນຸລັກ ​ແລະ​ ການ​ອະນຸລັກທຳ​ມະ​ຊາດ, ມີສະຖາບັນທ່ອງທ່ຽວແລະໂຮງແຮມແຫ່ງຊາດ ແລະ ມີສະຖາບັນສື່ມວນຊົນ, ວັດທະນະທໍາ ແລະທ່ອງທ່ຽວ ເຊິ່ງໄດ້ພະນັກງານທີ່ເຮັດວຽກກ່ຽວກັນການທ່ອງທ່ຽວໄດ້ຫຼາຍຮ້ອຍຄົນ.
ໂຄສະນາປະຊາສໍາພັນ: ເພື່ອດືງດູດໃຫ້ຄົນທັງພາຍໃນແລະຕ່າງປະເທດມາທ່ຽວຊົມເມືອງລາວ, ມາສໍາພັດກັບຮີດຄອງປະເພນີ ແລະ ປະຕິຍະກໍາທີ່ເປັນເອກະລັກ ສື່ມວນຊົນລາວ ລວມທັງສື່ສິ່ງພິມ, ໂທລະພາບ, ວິທະຍຸ ແລະ ສື່ສັງຄົມອອນລາຍຕ່າງໆໄດ້ສ້າງຄໍລໍາ, ສ້າງລາຍການທ່ອງທ່ຽວ ໂຄສະນາເຜີຍແຜ່ແຫຼງທ່ອງທ່ຽວ ແລະ ເທດສະການຕ່າງໆຢ່າງຕັ້ງໜ້າ.

3. ຍົກລະດັບການ ຊົມໃຊ້ ການທ່ອງທ່ຽວ Consumption Upgrading
 ເພື່ອດຶງດູດເອົານັກທ່ອງທ່ຽວມາຢ້ຽມຢາມລາວໃຫ້ໄດ້ຫຼາຍ, ຢູ່ຫຼາຍວັນ ແລະ ໃຊ້ຈ່າຍຫຼາຍຂຶ້ນກວ່າເກົ່າ ກໍ່ຄືຍົກລະດັບການຊົມໃຊ້ການທ່ອງທ່ຽວໃຫ້ສູງຂຶ້ນຈາກຄົນພາຍໃນແລະຕ່າງປະເທດ ຂ້າພະເຈົ້າຄິດວ່າມີປັດໄຈທັງພາຍໃນ ແລະ ປັດໄຈພາຍນອກ:
ປັດໄຈພາຍໃນ:
 - ປັບປຸງໂຄງລ່າງພື້ນຖານເພື່ອອຳນວຍຄວາມສະດວກໃນການເດີນທາງເຂົ້າ-ອອກປະເທດຂອງນັກທ່ອງທ່ຽວ ແລະ ຄົມມະນາຄົມຂົນສົ່ງ-ໄປມາສະດວກປອດໄພ.
- ປັບປຸງມາດຕະຖານໃນການບໍລິການຂອງໂຮງແຮມ, ບ້ານພັກ, ຜູ້ນໍາທ່ຽວ, ບໍລິການດີລາຄາຖືກ, ອາຫານ-ເຄື່ອງດື່ມສະອາດ-ປອດໄພ-ລາຄາຖືກ, ເພີ່ມຜະລິດຕະພັນທ່ອງທ່ຽວໃຫ້ຫຼາກຫຼາຍຮູບແບບສີສັນ, ຂະໜາດ ແລະ ຫຼາຍລາຄາ.
- ສ້າງກົນໄກ, ສ້າງຈຸດປະສານງານເພື່ອສະໜອງຂໍ້ມູນຂ່າວສານດ້ານການທ່ອງທ່ຽວໃຫ້ທົ່ວເຖິງ, ເອົາໃຈໃສ່ແກ້ໄຂບັນຫາຕ່າງໆທີ່ເປັນອຸປະສັກຂັດຂວາງການເຊື່ອມໂຍງການທ່ອງທ່ຽວໃນທຸກລະດັບ ເພື່ອແກ້ໄຂບັນຫາຕ່າງໆທີ່ນັກທ່ອງທ່ຽວປະສົບບັນຫາຕ່າງໆໄດ້ຢ່າງວ່ອງໄວ, ທັນກັບເຫດການ ແລະ ສະພາບການໃນຂອບເຂດທົ່ວປະເທດ.
- ສ້າງກົນໄກໃຫ້ມີການຈັດກອງປະຊູມປຶກສາຫາລືກັບອົງການແລະເຈົ້າໜ້າທີ່ທີ່ກ່ຽວຂ້ອງ, ກຸ່ມບໍລິສັດແລະກຸ່ມບໍລິດ້ານການທ່ອງທ່ຽວ ເພື່ອຊອກຫາຊ່ອງທາງໃນການແກ້ໄຂບັນໃນຕໍ່ໜ້າ.
- ຈັດພິທີຕ້ອນຮັບນັກທ່ອງທ່ຽວດ້ວຍໄມຕີຈິດມິດຕະພາບໂດຍນໍາໃຊ້ຮີດຄອງປະເພນີທີ່ດີງາມຂອງລາວ.
- ສ້າງກິດຈະກໍາຮ່ວມກັບຜູ້ປະກອບການຢ່າງຕໍ່ເນື່ອງເພື່ອໃຫ້ໂອກາດແກ່ເຂົາເຈົ້າໄດ້ມີການແລກປ່ຽນບົດຮຽນ ແລະ ປະສົບການທີ່ດີຕໍ່ກັນແລະກັນ ເພື່ອຮຽນຮູ້ ແລະ ປັບປຸງໃຫ້ດີຂຶ້ນໂດຍຕິດພັນກັບເທັກໂນໂລຊີ ແລະ ນະວັດຕະກຳ ໃໝ່ໃນການພັດທະນາການທ່ອງທ່ຽວ, ສ້າງງານ ແລະ ສ້າງລາຍຮັບທີ່ແນ່ນອນ. ພ້ອມນັ້ນກໍ່ໃຫ້ນັກທ່ອງທ່ຽວໄດ້ປະ ສົບການໃໝ່ໆ, ມີຄວາມສຸກ ແລະ ຄວາມເພິ່ງພໍໃຈທີ່ໄດ້ມາທ່ຽວລາວ.
- ສ້າງການທ່ອງທ່ຽວແບບວົງແຫວນກັບປະເທດເພື່ອນບ້ານກໍ່ຄື 6 ປະເທດລຸມແມ່ນນໍ້າຂອງ-ແມ່ນໍ້າລ້ານຊ້າງຕາມຂໍ້ລິເລີ່ມ ໜຶ່ງແລວ ໜຶ່ງເສັ້ນທາງ ໂດຍສະເພາະທາງລົດໄຟລາວ-ຈີນ ແລະ ຈະເຊື່ອມໄປໃສ່ບັນດາປະເທດອາຊຽນ ເຊິ່ງນີ້ອັນຈະອຳນວນຄວາມສະດວກໃນການເດີນທາງເຂົ້າ-ອອກຂອງນັກທ່ອງທ່ຽວຈີນ ແລະ ອາຊຽນເພີ່ມຂຶ້ນ.
- ຍົກລະດັບການມີສ່ວນຮ່ວມຂອງພາກລັດ, ພາກທຸລະກິດ ແລະ ປະຊາຊົນ ເພື່ອຮ່ວມມືກັນໃນການວາງແຜນ, ການດຳເນີນງານ, ການປະສານສົມທົບ ແລະ ການຕອບຮັບກັບທຸກສະຖານະການທີ່ເກີດຂຶ້ນໃຫ້ທັນເວລາ ອັນນີ້ກໍ່ເພື່ອຮັບປະກັນຄວາມຄວາມສະຫງົບປອດໄພ.
- ເພີ່ມທະວີການໂຄສະນາ ແລະ ການສົ່ງເສີມການຕະຫຼາດໂດຍສ້າງກົນໄກໃຫ້ມີການໂຄສະນາຢ່າງຕໍ່ເນື່ອງ ແລະ ຜະລິດເນື້ອໃນການໂຄສະນາດີມີຄຸນນະພາບດີ, ຫຼາກຫຼາຍຮູບແບບສີສັນ, ໂຄສະນາຜ່ານຫຼາຍຊ່ອງທາງ, ກ້ວາງຂວາງ ແລະ ໄປເຖິງທຸກໆກຸ່ມເປົ້າໝາຍ ເຄື່ອງມືດັ່ງນີ້ລວມທັງສື່ສິງພິມ, ວິທະຍຸ, ໂທລະພາບ ແລະ ສື່ສັງຄົມອອນລາຍຕ່າງໆດ້ວຍພາບນິ້ງ, ພາບວີດີໂອ, ແສງສີສຽງ ແລະ ບົດຄວາມ.
ນອກຈາກໂຄສະນາໃຫ້ຕ່າງປະເທດມາທ່ຽວລາວແລ້ວ ປະຈຸບັນໃຫ້ຄົນລາວກໍ່ອອກໄປທ່ຽວທັງພາຍໃນແລະ ຕ່າງປະເທດໃນແຕ່ລະວັນນັບມື້ນັບສູງຂຶ້ນເຊັ່ນເລື້ອຍໆ.
ປັດໄຈພາຍນອກ:
- ສະພາບເສດຖະກິດ-ສັງຄົມພາກພື້ນ, ຂອງໂລກ ແລະ ຂອງປະເທດເປົ້າໝາຍທີ່ຢາກໃຫ້ເຂົາເຈົ້າມາທ່ຽວລາວ.
- ສະຖານະພາບໃນການພົວພັນຮ່ວມມືກັບກຸ່ມປະເທດ ຫຼື ປະເທດດັ່ງກ່າວເພື່ອອໍານວຍຄວາມສະດວກໃນການເຂົ້າມາທ່ຽວຢູ່ລາວ ເປັນຕົ້ນການຍົກເວັ້ນວິຊາ ແລະ ຕໍ່ວິຊາ.
- ທ່າອ່ຽງ ແລະ ຄວາມນິຍົມການທ່ອງທ່ຽວຂອງປະເທດເປົ້າໝາຍທີ່ຢາກໃຫ້ເຂົາເຈົ້າມາທ່ຽວລາວ.
- ເງື່ອນໄຂ ແລະ ສະພາບແວດລ້ອມຂອງປະເທດເປົ້າໝາຍທີ່ຢາກໃຫ້ເຂົາເຈົ້າມາທ່ຽວລາວ ເປັນຕົ້ນປະເທດເພື່ອນບ້ານທີ່ມີຊາຍແດນຕິດຕໍ່ກັນ, ມີຄວາມສະດວກທາງດ້ານຄົມມະນາຄົມ ແລະ ມີສັນຍາຜູກພັນກັນ.
ທ່ານຍິງ ແລະ ທ່ານຊາຍ ທີ່ຮັກແພງ!
          ຂ້າພະເຈົ້າຂໍຮຽກຮ້ອງມາຍັງສື່ຕ່າງໆຢູ່ໃນ 6 ປະເທດລຸ່ມແມ່ນ້ຳຂອງ-ແມ່ນໍ້າລ້ານນໍາໃຊ້ສື່ໃຫ້ເກີດປະໂຫຍດສູງສຸດໃນການ ຮ່ວມມືຊ່ວຍເຫຼືອເຊິ່ງກັນແລະກັນ, ໃນການໂຄສະນາການທ່ອງທ່ຽວໃຫ້ກັນແລະກັນ ເພື່ອໃຫ້ນັກທ່ອງທ່ຽວໄປມາຫາສູ່ກັນເປັນປົກກະຕິ ແລະ ໃຫ້ນັກທ່ອງທ່ຽວຈາກປະເທດທີສາມມາທ່ຽວຊົມພາກພື້ນນີ້ໃຫ້ຫຼາຍເທົ່າທີ່ຈະຫຼາຍໄດ້.
ສຸດທ້າຍນີ້ຂ້າພະເຈົ້າຂໍອວຍພອນໃຫ້ແຂກທີ່ມີກຽດທັງໝົດທີ່ມາຮ່ວມກອງປະຊຸມແມ່ນ້ຳຂອງ-ແມ່ນໍ້າລ້ານຊ້າງ ຈົ່ງມີແຕ່ຄວາມສຸກສົມຫວັງດັ່ງປາຖະໜາ, ມີສຸຂະພາບເຂັ້ມແຂງ ແລະ ປະສົບຜົນສຳເລັດໃນໜ້າທີ່ການງານ. ຂ້າພະເຈົ້າ ຍິນດີແລກປ່ຽນ ແລະ ຖອດຖອນບົດຮຽນກັບບັນນດາທ່ານ.
ຂໍຂອບໃຈ