ຮ່າງ ບົດກ່າວປິດ

ຂອງ ປະທານກອງປະຊຸມ ກອງປະຊຸມສຸດຍອດສື່ມວນຊົນ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ
ຮຽນ: ທ່ານ ...................................
ຮຽນ: ທ່ານ............................
ຮຽນ: ບັນດາທ່ານຜູ້ແທນສື່ມວນຊົນ ທັງ 6 ປະເທດ ລຸ່ມແມ່ນໍ້າຂອງ, ແມ່ນໍ້າລ້ານຊ້າງ ບັນດາທ່ານ ຍິງ ທ່ານຊາຍທີ່ມີກຽດ ທັງຫລາຍ.

ກອງປະຊຸມສຸດຍອດສື່ມວນຊົນ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ເຊິ່ງຖືໄດ້ວ່າ ເປັນເວທີແຫ່ງການສະແດງທັດສະນະເພື່ອສ້າງຄວາມເຂົ້າອົກເຂົ້າໃຈ ເຊິ່ງກັນແລະກັນ ແລະ ຮ່ວມກັນພັດທະນາ ລະຫວ່າງ 6 ປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ ໄດ້ດຳເນີນມາບົນຈິດໃຈ ແລະ ບັນຍາກາດ ແຫ່ງໄມຕີຈິດມິດຕະພາບ ຖານເພື່ອນມິດ ບ້ານໃກ້ເຮືອນຄຽງ ທີ່ດີ ແລະ ສ້າງສັນເຮັດໃຫ້ກອງປະຊຸມສຸດຍອດຄັ້ງນີ້ໄດ້ຮັບຜົນສຳເລັດຢ່າງຈົບງາມ. ຂ້າພະເຈົ້າ ໃນນາມ ເຈົ້າພາບຮ່ວມ ຈັດກອງປະຊຸມສຸດຍອດຄັ້ງນີ້ ຂໍສະແດງຄວາມຊົມເຊີຍ ຕໍ່ບັນດາທ່ານຜູ້ແທນຂັ້ນສູງອົງການສື່ມວນຊົນ ທັງ 6 ປະເທດ ທີ່ໄດ້ ໃຫ້ການຮ່ວມມືຢ່າງຕັ້ງໜ້າເຂົ້າຮ່ວມ ປະກອບຄຳຄິດຄຳເຫັນໃນກອງປະຊຸມສົນທະນາ ແລະ ການແລກປ່ຽນ ດ້ວຍຮູບການຕ່າງໆໃນໂອກາດຈັດກອງປະຊຸມສຸດຍອດຄັ້ງນີ້ ພ້ອມທັງເຫັນດີເຫັນພ້ອມ ແລະ ເປັນເອກະພາບກັນ ບົນພື້ນຖານຈິດໃຈປຶກສາຫາລືຢ່າງສະເໝີພາບໃນການສືບຕໍ່ເພີ່ມທະວີເສີມຂະຫຍາຍເນື້ອໃນຈິດໃຈຂອງກອງປະຊຸມສຸດຍອດຄັ້ງນີ້ ທີ່ດຳເນີນພາຍໃຕ້ຫົວຂໍ້ ການຮ່ວມມືປະຊາຄົມ ແມ່ນໍ້າຂອງ-ແມ່ນໍ້າລ້ານຊ້າງ ເພື່ອອະນາຄົດອັນສະຫວ່າງສະໄຫວ. ບົນຈິດໃຈດັ່ງກ່າວນີ້ ບັນດາທ່ານຜູ້ແທນຂັ້ນສູງອົງການສື່ມວນຊົນ ທັງ 6 ປະເທດ ເຫັນໄດ້ບົດບາດ ແລະ ໜ້າທີ່ສຳຄັນຂອງ ສື່ມວນຊົນ ໃນການຊຸກຍູ້ສະໜັບສະໜູນການເສີມສ້າງສັນຕິພາບ ແລະ ສະຖຽນລະພາບຂອງພາກພື້ນ, ການຫລຸດຜ່ອນຄວາມແຕກໂຕນກັນທາງດ້ານການພັດທະນາ ແລະ ຮ່ວມກັນສ້າງປະຊາຄົມຮ່ວມຊາຕາກຳຂອງປະເທດລຽບຕາມແມ່ນໍ້າຂອງ-ແມ່ນໍ້າລ້ານຊ້າງ ທີ່ມີຄວາມສາມັກຄີ, ຊ່ວຍເຫລືອເຊິ່ງກັນແລະກັນ, ຮ່ວມມືກັນ ແລະ ຕ່າງຝ່າຍຕ່າງມີຜົນປະໂຫຍດແລະ ໃນກອງປະຊຸມຄັ້ງນີ້ ພວກເຮົາໄດ້ສະແດງທັດສະນະເປັນເອກພາບກັນດັ່ງລຸ່ມນີ້: ໜຶ່ງ ສະໜັບສະໜູນຢ່າງຕັ້ງໜ້າ ໃນການເສີມຂະຫຍາຍບົດບາດຂອງສື່ມວນຊົນ ດ້ວຍການນຳສະເໜີຂ່າວຢ່າງຮອບດ້ານ ມີລັກສະນະສ້າງສັນ, ຖືກຕ້ອງເປັນຈິງ, ພາວະວິໄສ ແລະ ທ່ຽງທຳ ແນໃສ່ຊຸກຍູ້ການເຊື່ອມຈອດລະຫວ່າງ ຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຂອງ ສປຈີນ ແລະ ໂຄງການຂອບຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ພ້ອມທັງຊຸກຍູ້ຄວາມເຂົ້າອົກເຂົ້າໃຈກັນ ແລະ ຄວາມໄວ້ເນື້ອເຊື່ອໃຈກັນ ລະຫວ່າງປະຊາຄົມແມ່ນໍ້າຂອງ-ແມ່ນໍ້າລ້ານຊ້າງ ອີກດ້ວຍ. ສອງ ຢືນຢັນໃຫ້ການສະໜັບສະໜູນຢ່າງຕັ້ງໜ້າໃນການຊຸກຍູ້ສື່ມວນຊົນສຳຄັນຂອງບັນດາປະເທດໃນພາກພື້ນໃຫ້ດຳເນີນການສົນທະນາປຶກສາຫາລືຮ່ວມກັນໃນການແລກປ່ຽນຜະລິດຕະພັນດ້ວຍຫລາຍຮູບການ ໂດຍສະເພາະ ການແລກປ່ຽນຂໍ້ມູນຂ່າວສານ, ເຕັກນິກເຕັກໂນໂລຊີທີ່ກ້າວໜ້າ ທັນສະໄໝ ຂອງແຕ່ລະປະເທດໃນພາກພື້ນ ພ້ອມທັງຊຸກຍູ້ການໄປມາຫາສູ່ ແລະ ຢ້ຽມຢາມເຊິ່ງກັນແລະກັນ ເພື່ອບັນລຸໝາກຜົນການຮ່ວມມື ໃນຕໍ່ໜ້າຮ່ວມກັນ. ສາມ ຕ່າງກໍຕີລາຄາສູງ ທີ່ເຫັນວ່າ ການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ໄດ້ກ້າວໄປສູ່ກົນໄກການຮ່ວມມືລະດັບພາກພື້ນໃໝ່ທີ່ມີລັກສະນະເປັນເອກະລັກ ໂດຍມີຄວາມເຂັ້ມແຂງພາຍໃນ ແລະ ໄດ້ຮັບການສະໜັບສະໜູນຈາກການຮ່ວມມື ໃຕ້-ໃຕ້ ເຊິ່ງຈະຊ່ວຍໃຫ້ການກໍ່ສ້າງຊຸມຊົນອາຊຽນ ແລະ ຂະບວນການເຊື່ອມໂຍງເຂົ້າກັບພາກພື້ນ ແລະ ສົ່ງເສີມການຈັດຕັ້ງປະຕິບັດແຜນງານຂອງອົງການສະຫະປະຊາຊາດ 2030 ເພື່ອການພັດທະນາແບບຍືນຍົງ. ສີ່ ແລກປ່ຽນຄຳຄິດຄຳເຫັນ ໃນເວທີສົນທະນາ ກ່ຽວກັບ ກາລະໂອກາດ ແລະ ບັນຫາທີ່ເປັນສິ່ງທ້າທາຍຂອງສື່ໃໝ່ໃນຍຸກດີຈີຕອນ ແລະ ການສົ່ງເສີມການທ່ອງ ທ່ຽວ ໃນໄລຍະກອງປະຊຸມສຸດຍອດຄັ້ງນີ້ອີກດ້ວຍ. ຫ້າ ການສົ່ງເສີມການທ່ອງທ່ຽວ ໂດຍເອົາການເຜີຍແຜ່ໂຄສະນາແຫຼ່ງທ່ອງທ່ຽວພາຍໃນປະເທດຂອງພວກເຮົາ ຜ່ານສື່ມວນຊົນເປັນການປະກອບສ່ວນສຳຄັນແກ່ການພັດທະນາ ເສດຖະ ກິດ-ສັງຄົມ, ການໄປມາຫາສູ່ ແລະ ການແລກປ່ຽນວັດທະນະທຳ ລະຫວ່າງ ປະຊາຊົນດ້ວຍກັນ. ບັນດາທ່ານຍິງ ທ່ານຊາຍ ທີ່ມີກຽດທັງຫລາຍ! ໃນໂອກາດນີ້ ໃນນາມຕາງໜ້າ ລັດຖະບານ ແລະ ໃນນາມ ເຈົ້າພາບຮ່ວມ ຈັດກອງປະຊຸມສຸດຍອດຄັ້ງນີ້ ຂໍສະແດງຄວາມຂອບອົກຂອບໃຈມາຍັງບັນດາທ່ານຜູ້ແທນຂັ້ນສູງອົງການສື່ມວນຊົນ ທັງ 6 ປະເທດ ທີ່ໄດ້ໃຫ້ການຮ່ວມມື ປະກອບຄຳຄິດຄຳເຫັນ ແລະ ສະແດງທັດສະນະຢ່າງສ້າງສັນ ເຮັດໃຫ້ ກອງປະຊຸມສຸດຍອດຂອງພວກເຮົາ ປະສົບຜົນສຳເລັດຢ່າງຈົບງາມ. ຂໍອວຍພອນໃຫ້ບັນດາທ່ານຜູ້ແທນຈົ່ງມີແຕ່ຄວາມສຸກ, ມີສຸຂະພາບເຂັ້ມແຂງ ແລະ ປະສົບຜົນສຳເລັດໃນໜ້າທີ່ວຽກງານ ແລະ ຂອວຍພອນທຸກທ່ານເດີນທາງກັບປະເທດດ້ວຍຄວາມສະຫວັດດີພາບທຸກປະການ ມາຮອດນີ້ຂ້າພະເຈົ້າ ຂໍປິດກອງປະຊຸມສຸດຍອດຄັ້ງນີ້ຢ່າງເປັນທາງການ,........ ຂໍຂອບໃຈ!