ບົດກ່າວເປີດ

ຂອງ ທ່ານລັດຖະມົນຕີ ກະຊວງ ຖວທ ທີ່ກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ
- ຮຽນ ສະຫາຍ ຫວ່ງ ຄຸນ ໝິງ ກໍາມະການກົມການເມືອງສູນກາງພັກ, ຫົວຫນ້າຄະນະໂຄສະນາອົບຮົມສູນກາງພັກກອມມູນິດຈີນ ທີ່ເຄົາລົບ ແລະ ນັບຖືຢ່າງສູງ.
- ຮຽນ ສະຫາຍ ປອ ກິແກ້ວ ໄຂຄໍາພິທູນ, ຄະນະເລຂາທິການສູນກາງພັກ, ຫົວຫນ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ທີ່ເຄົາລົບ ແລະ ນັບຖືຢ່າງສູງ.
- ຮຽນສະຫາຍ ໂຖເຈີ້ນ ຫົວໜ້າບັນນາທິການໜັງສືພືມປະຊາຊົນລາຍວັນ ສປຈີນ
- ຮຽນສະຫາຍ ຫຼີຈີນຊາວ ຮອງລັດຖະມົນຕີກະຊວງວັດທະນະທໍາແລະທ່ອງທ່ຽວແຫ່ງ ສປ ຈີນ
- ຮຽນ ບັນດາຜູ້ຕາງໜ້າອົງການສື່ມວນຊົນ 6 ປະເທດລຸ່ມແມ່ນໍ້າຂອງ ແມ່ນໍ້າລ້ານຊ້າງ, ບັນດາແຂກທີ່ມີກຽດ, ຄະນະກະກຽມກອງປະຊຸມ ແລະ ສື່ມວນຊົນທຸກທ່ານ ທີ່ນັບຖື ແລະ ຮັກແພງທັງຫລາຍ.

ໃນນາມຕາງໜ້າໃຫ້ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກໍ່ຄືສື່ມວນຊົນລາວ, ຂ້າພະເຈົ້າຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງ ທີ່ໄດ້ເປັນເຈົ້າພາບຮ່ວມ ກັບ ສຳນັກໜັງສືພິມປະຊາຊົນລາຍວັນ ສ ປ ຈີນ ຈັດກອງປະຊຸມສຸດຍອດສື່ມວນຊົນຂອບການຮ່ວມມື ແມ່ນໍ້າຂອງ-ແມ່ນນໍ້າລ້ານຊ້າງ ໃນມື້ນີ້ທີ່ ນະຄອນຫຼວງວຽງຈັນ. ໃນໂອກາດອັນເປັນສິລິມຸງຄຸນນີ້, ກອງປະຊຸມພວກເຮົາ ຂໍສະແດງຄວາມຍິນດີຄໍານັບຮັບຕ້ອນ ສະຫາຍ ຫວ່ງ ຄຸນ ໝິງ ກໍາມະການກົມການເມືອງສູນກາງພັກ, ຫົວຫນ້າໂຄສະນາອົບຮົມສູນກາງພັກກອມມູນິດຈີນ, ສະຫາຍ ປອ ກິແກ້ວ ໄຂຄໍາພິທູນ, ຄະນະເລຂາທິການສູນກາງພັກ, ຫົວຫນ້າຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ, ຍິນດີຕ້ອນຮັບ ຄະນະນຳອົງການສື່ມວນຊົນ, ອົງ ການສື່ມວນຊົນ ຈາກ ສປ ຈີນ, ຣາຊະອານາຈັກກຳປູເຈຍ, ສະຫະພາບມຽນມາ, ຣາຊະອານາຈັກໄທ, ສ ສ ຫວຽດນາມ ແລະ ສປປ ລາວ ທີ່ໄດ້ສະລະເວລາອັນມີຄ່າໃຫ້ກຽດເຂົ້າຮ່ວມກອງປະຊຸມສຸດຍອດສື່ມວນຊົນຂອງພວກເຮົາໃນຄັ້ງນີ້. ບັນດາທ່ານຍິງ ທ່ານຊາຍ ທີ່ນັບຖື ແລະ ຮັກແພງ! ກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ໄດ້ຈັດຂື້ນເທື່ອທຳອິດ ວັນທີ 20 ທັນວາ 2017 ຢູ່ ນະຄອນຫຼວງປັກກິ່ງ ສ ປ ຈີນ ຊຶ່ງຖືເປັນບາດກ້າວອັນສຳຄັນໃນການຮ່ວມມືດ້ານກິດຈະການສື່ມວນຊົນ ຂອງ 6 ປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ ຊຶ່ງມີເປົ້າ ໝາຍ ແລະ ຈຸດປະສົງຮ່ວມກັນ ໃນການເສີມສ້າງສັນຕິພາບ ແລະ ສະຖຽນລະພາບຂອງພາກພື້ນ, ຫຼຸດຜ່ອນຄວາມແຕກໂຕນກັນດ້ານການພັດທະນາ, ເພີ່ມທະວີການຮ່ວມມືກັນ ລະຫວ່າງບັນດາປະ ເທດລຽບຕາມແມ່ນ້ຳຂອງ-ແມ່ນໍ້າລ້ານຊ້າງ ດ້ວຍການສ້າງຄວາມເຂົ້າອົກເຂົ້າໃຈກັນ, ສາມັກຄີຊ່ວຍ ເຫຼືອເຊິ່ງກັນແລະກັນ, ເພີ່ມທະວີການປຶກສາຫາລື ແລະ ແລກປ່ຽນການພົວພັນຮ່ວມມືຢ່າງສະເໝີພາບ, ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ. ຂໍ້ລິເລີ່ມ 4 ຂໍ້ ໃນ ຖະແຫລງການຮ່ວມ ຂອງກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ທີ່ນະຄອນຫລວງປັກກິ່ງ ໃນທ້າຍປີ 2017 ໄດ້ກຳນົດເອົາ "ການຮ່ວມມືປະຊາຄົມ ແມ່ນໍ້າຂອງ-ແມ່ນໍ້າລ້ານຊ້າງ ເພື່ອອະນາຄົດອັນສະຫວ່າງສະໄຫວ" ເປັນຫົວຂໍ້ຫຼັກປະຈໍາປີນີ້. ໃນການກະກຽມກອງປະຊຸມດັ່ງກ່າວ ສື່ມວນຊົນຈາກ 6 ປະເທດຂອງພວກເຮົາໄດ້ເຂົ້າຮ່ວມຝຶກອົບຮົມຢູ່ ສປ ຈີນ ແລະ ຈະໄດ້ເຄື່ອນໄຫວເກັບກຳຂໍ້ມູນ ສະຖານທີ່ທ່ອງທ່ຽວຕົວຈິງຢູ່ຫຼາຍແຂວງໃນ ສປປ ລາວ ເພື່ອສ້າງເປັນບົດ ແລະ ເປັນສາລະຄະດີທ່ອງທ່ຽວປະເພດຕ່າງໆ ທີ່ຜູ້ສື່ຂ່າວໄປເກັບກໍານັ້ນ ຈະໄດ້ໄປເຜີຍແຜ່ຢູ່ແຕ່ລະປະເທດຂອງຕົນ ແລະ ຈະປະກອບສ່ວນ ໂຄສະນາໃຫ້ແກ່ການທ່ອງທ່ຽວລາວ ໃນປີ 2018 ຊຶ່ງພໍດີເປັນປີທີ່ລັດຖະບານ ແຫ່ງ ສປປ ລາວ ພວກຂ້າພະເຈົ້າໄດ້ເປີດປີທ່ອງທ່ຽວລາວ (Visit Lao year) ເພື່ອດຶງດູດໃຫ້ນັກທ່ອງທ່ຽວຈາກທົ່ວທຸກມູມໂລກ ເດີນທາງມາສໍາພັດ ແລະ ທ່ຽວຊົມແຫຼ່ງທ່ອງທ່ຽວທາງ ວັດທະນະທຳ, ປະຫວັດສາດ ແລະ ທຳມະຊາດ ຂອງ ປະເທດລາວ. ນອກນັ້ນ,ໃນການດໍາເນີນກອງປະຊຸມນີ້ຍັງຈະມີເວທີແລກປ່ຽນຄຳເຫັນໃນຫົວຂໍ້ຍ່ອຍກ່ຽວກັບສື່ແບບໃໝ່ ແລະ ການສົ່ງເສີມໂຄສະນາການທ່ອງທ່ຽວຜ່ານສື່ມວນຊົນໃນປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງຕື່ມອີກ. ຂ້າພະເຈົ້າ ຫວັງຢ່າງຍິ່ງວ່າ ໃນກອງປະຊຸມສຸດຍອດສື່ມວນຊົນຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງນີ້ ບັນດາທ່ານຜູ້ແທນອົງການສື່ມວນຊົນທັງ 6 ປະເທດ ຈະໄດ້ຮ່ວມກັນຊົມໃຊ້ກາລະໂອກາດ,ຮ່ວມກັນປຶກສາຫາລື ເພື່ອຮ່ວມກັນພັດທະນາ ແລະ ຊຸກຍູ້ເຮັດໃຫ້ການຮ່ວມມື ໃນດ້ານສື່ມວນຊົນ ລະຫວ່າງ 6 ປະເທດໃນພາກພື້ນຂອງພວກເຮົານີ້ ໄດ້ຮັບຜົນສຳເລັດຢ່າງໜ້າເພິ່ງພໍໃຈ ແລະ ໃຫຍ່ຫຼວງກວ່າເກົ່າ. ອີກເທື່ອໜຶ່ງຕາງໜ້າໃຫ້ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ກໍ່ຄືສື່ມວນຊົນ ທົ່ວປະເທດ ຂ້າພະເຈົ້າຂໍສະແດງຄວາມຂອບອົກຂອບໃຈເປັນຢ່າງຍິ່ງ ມາຍັງ ສຳນັກໜັງສືພິມປະຊາຊົນລາຍວັນ ສປ ຈີນ ທີ່ໄດ້ໃຫ້ຄວາມເຊື່ອໝັ້ນ ແລະໄວ້ວາງໃຈ ເລືອກເອົາ ສປປ ລາວ ເປັນເຈົ້າພາບຮ່ວມໃນການຈັດກອງປະຊຸມສຸດຍອດສື່ມວນຊົນຄັ້ງນີ້. ສຸດທ້າຍນີ້ ຂໍອວຍພອນໃຫ້ກອງປະຊຸມສຸດຍອດຄັ້ງນີ້ ປະສົບຜົນສຳເລັດຢ່າງຈົບງາມທຸກປະການ ແລະ ໃນໂອກາດເລີກງາມຍາມດີນີ້ ຂ້າພະເຈົ້າ ຂໍອະນຸຍາດປະກາດເປີດ "ກອງປະຊຸມສຸດຍອດສື່ມວນຊົນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ປະຈຳປີ 2018" ຢ່າງເປັນທາງການນັບແຕ່ເວລານີ້ເປັນຕົ້ນໄປ. ຂໍຂອບໃຈ