ຄຳເຫັນ
ຂອງສະຫາຍ ກິ​ແກ້ວ ​ໄຂ​ຄຳ​ພິທູນ ​ເລຂາທິການ​ສູນ​ກາງ​ພັກ, ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ ກ່າວ​ຕໍ່ “ກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ”
(ນະຄອນຫຼວງ​ວຽງ​ຈັນ​ວັນ​ທີ02/07/2018)

  • ຂໍຮຽນ ສະຫາຍ ຮວງ​ຄຸນ​ມິ​ງ ກໍາມະການກົມການເມືອງສູນກາງພັກ, ຫົວຫນ້າໂຄສະນາອົບຮົມສູນກາງພັກກອມມູນິດຈີນ ທີ່​ນັບຖື!
  • ຂໍຮຽນ ທ່ານ ສຈ ປອ ບໍ່ແສງຄຳ ວົງດາລາ ກຳມະການສູນກາງພັກ, ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທີ່​ນັບຖື!
  • ຮຽນ ສະຫາຍ ໂຖເຈິ້ນ, ຫົວໜ້າບັນນາທິການໜັງສືພິມປະຊາຊົນລາຍວັນ ສປຈີນ.
  • ຮຽນ ສະຫາຍ ຫຼີຈິນຊາວ ຮອງລັດຖະມົນຕີກະຊວງວັດທະນະທໍາ ແລະ ທ່ອງທ່ຽວ ສປຈີນ.
  • ບັນດາ ທ່ານ ຜູ້ຕາງໜ້າ ອົງການສື່ມວນຊົນ 6 ປະເທດລຸ່ມແມ່ນໍ້າຂອງ-ແມ່ນໍ້າລ້ານຊ້າງ, ບັນດາແຂກ, ຄະນະກະກຽມກອງປະຊຸມ ແລະ ສື່ມວນຊົນທຸກທ່ານ ທີ່​ຮັກ​ແພງ.

ຂ້າພະເຈົ້າ ຮູ້ສຶກດີໃຈ ແລະ ຖືເປັນກຽດຢ່າງ​ສູງ ທີ່ໄດ້ຕາງໜ້າໃຫ້ສູນກາງພັກ ກໍຄື ຄະນະໂຄສະນາອົບຮົມສູນກາງພັກ ປະຊາຊົນປະຕິວັດລາວ ເຂົ້າຮ່ວມພິທີເປີດກອງປະຊຸມສຸດຍອດສື່ມວນຊົນຂອບການຮ່ວມມືແມ່ນໍ້າຂອງ-ແມ່ນໍ້ລ້ານຊ້າງ ທີ່ມີຄວາມໝາຍສຳຄັນໃນມື້ນີ້  ຊຶ່ງເປັນເວທີຮ່ວມມື ນໍາພາແນວຄິດ, ສ້າງຄວາມເຂົ້າໃຈ ລະຫວ່າງ 6 ປະເທດ ແມ່ນໍ້າຂອງ-ແມ່ນໍ້າລ້ານຊ້າງ ໃນການສືບ​ຕໍ່ຈັດຕັ້ງຜັນຂະຫຍາຍເນື້ອໃນຈິດ​ໃຈຫຼາຍໆກອງປະຊຸມທີ່ຜ່ານມາ, ນັບແຕ່ກອງປະຊຸມເທື່ອທຳອິດ ໃນຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ທີ່ໄດ້ຈັດຂື້ນ ຢູ່ເມືອງ ຊານຢາ ແຂວງ ໄຫໜ່ານ ສ ປ ຈີນ ເມື່ອວັນທີ 23 ມີນາ 2016.
ໃນໂອກາດສຳຄັນນີ້ ຂ້າພະເຈົ້າຂໍຍິນດີຕ້ອນຮັບຢ່າງອົບອຸ່ນ ຕໍ່ ສະຫາຍ ຮວງ​ຄຸນ​ມິ​ງ ກໍາມະການກົມການເມືອງສູນກາງພັກ, ຫົວຫນ້າໂຄສະນາສູນກາງ ພັກກອມມູນິດຈີນ ພ້ອມຄະນະຜູ້ແທນຂັ້ນສູງຂອງ ສ ປ ຈີນ  ແລະ ຄະນະຜູ້ແທນຂັ້ນສູງຂອງອົງການຄຸ້ມຄອງສື່ມວນຊົນຈາກ 6 ປະເທດ ແມ່ນໍ້າຂອງ-ແມ່ນໍ້າລ້ານຊ້າງ. ທີ່ເຂົ້າຮ່ວມກອງປະຊຸມສຸດຍອດສື່ມວນຊົນ​ໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ໂດຍການເປັນເຈົ້າພາບຮ່ວມ ລະຫວ່າງ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ໜັງສືພິມປະຊາຊົນລາຍວັນຂອງ ສ ປຈີນ ທີ່ ນະຄອນຫຼວງວຽງຈັນ.
ໃນນາມຫົວໜ້າໂຄສະນາອົບຮົມສູນກາງພັກ ສປປລາວ  ຂ້າພະເຈົ້າຕີລາສູງຕໍ່ຜົນສຳ ເລັດ ຂອງກອງປະຊຸມສຸດຍອດສື່ມວນຊົນຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງ ທີ່ຈັດຢູ່ນະຄອນຫຼວງປັກກິ່ງ ປີກາຍນີ້ ແລະ ສະໜັບສະໜຸນເວທີປຶກສາຫາລືການຮ່ວມມືຂອງບັນດາສື່ມວນຊົນ 6 ປະເທດ ທີ່ໄດ້ກຳນົດ ເປົ້າໝາຍ ແລະ ຈຸດປະສົງລະດັບຄາດໝາຍຮ່ວມກັນ ໃນການປະກອບສ່ວນຊຸກຍູ້ການພັດທະນາເສດຖະກິດ-ສັງຄົມຂອງບັນດາປະເທດໃນພາກພື້ນ, ສ້າງຄວາມຈະເລີນຮຸ່ງເຮືອງຮ່ວມກັນ, ສ້າງສັນຕິ ພາບ-ມິດຕະພາບ, ສ້າງຄວາມເຂົ້າອົກເຂົ້າໃຈຮ່ວມກັນບົນພື້ນຖານຈິດໃຈຂອງຂໍ້ລິເລີ່ມ“ໜຶ່ງແລວໜຶ່ງເສັ້ນທາງ” ແລະ ໂຄງການການຮ່ວມມືແມ່ນ້ຳລ້ານຊ້າງ-ແມ່ນ້ຳຂອງ ທີ່ພວມໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ໃນປັດຈຸບັນນີ້.
ພວກເຮົາຮັບຮູ້ນຳກັນແລ້ວວ່າ ນັບແຕ່ ໄດ້ສ້າງຕັ້ງ ຄູ່ເຈລະຈາ ອາຊຽນ-ຈີນ ຂື້ນໃນ ປີ 1991 ສອງຝ່າຍໄດ້ຍົກສູງຄວາມເຊື່ອໝັ້ນ ທາງດ້ານການເມືອງ, ການຮ່ວມມືທາງດ້ານເສດຖະກິດ, ວັດທະ ນະທຳ-ສັງຄົມ ແລະ ການແລກປ່ຽນຖອດຖອນບົດຮຽນ ເຊິ່ງກັນ ແລະ ກັນ ໃນຫຼາຍຂະແໜງການ ແລະ ເຫັນວ່າ ການຮ່ວມມື ລະຫວ່າງ ຈີນ-ອາຊຽນ, ອາຊຽນ-ຈີນ ມີຄວາມກ້າວໜ້າ ແລະ ໄດ້ຮັບການພັດທະນາຢ່າງຕໍ່ເນື່ອງ ໂດຍສະເພາະການຮ່ວມມືລະຫວ່າງສື່ມວນຊົນດ້ວຍກັນ ​ເຊິ່ງໄດ້ຮ່ວມກັນຍົກສູງ ແລະ ເສີມຂະຫຍາຍບົດບາດ ແລະ ໜ້າທີ່ສຳຄັນຂອງຕົນໃນການຮ່ວມມື, ແລກປ່ຽນ ແລະ ເຜີຍແຜ່ ໂຄສະນາ ຂໍ້ມູນຂ່າວສານ ລະຫວ່າງກັນ ແລະ ກັນ. ມັນສອດຄ່ອງກັບແນວທາງນະໂຍບາຍຂອງ ພັກ ແລະ ລັດຖະບານ ສປປ ລາວ ທີ່ຍາມໃດກໍເຫັນໄດ້ຄວາມສຳຄັນຂອງສື່ມວນຊົນພ້ອມທັງໃຫ້ການສະໜັບສະໜູນ ສົ່ງເສີມ ແລະ ພັດທະນາ ອົງການສື່ມວນຊົນຂອງຕົນໃຫ້ ກ້າວໜ້າຂະຫຍາຍຕົວ, ເຂັ້ມແຂງ ແລະ  ມີຄຸນນະພາບສູງຂຶ້ນເລື້ອຍໆ ແນໃສ່ເພື່ອຮັບປະກັນເຮັດໃຫ້ການພັດທະນາວຽກງານສື່ມວນຊົນ ແລະ ການເຊື່ອມໂຍງດ້ານເຕັກໂນໂລຊີ ທຽມທັນກັບພາກພື້ນ ແລະ ສາກົນ.
ສະນັ້ນ, ໃນກອງປະຊຸມສຸດຍອດຂອງພວກເຮົາຄັ້ງນີ້ ພາຍໃຕ້ຫົວຂໍ້ “ການຮ່ວມມືປະຊາຄົມ ແມ່ນໍ້າຂອງ-ແມ່ນໍ້າລ້ານຊ້າງ ເພື່ອອະນາຄົດອັນສະຫວ່າງສະໄຫວ” ເປັນການຕອບສະໜອງ ແລະ ສະໜັບສະໜູນ ຍຸດທະສາດ “ໜຶ່ງແລວ ໜຶ່ງເສັ້ນທາງ” ທີ່ເປັນຂໍ້ລິເລີ່ມສຳຄັນຂອງ ສປ ຈີນ, ກອງປະຊຸມລະດັບລັດຖະມົນຕີຖະແຫລງຂ່າວ ອາຊຽນ-ຈີນ ຄັ້ງວັນທີ 22 ເດືອນພະຈິກ 2017 ທີ່ ຊູໂຈ ສປ ຈີນ ແລະ ສະໜອງຕອບກອງປະຊຸມສຸດຍອດສື່ມວນຊົນ ​ໃນຂອບການຮ່ວມມືແມ່ນໍ້າລ້ານຊ້າງ-ແມ່ນໍ້າຂອງເທື່ອທຳອິດ ຈັດ​ຂຶ້ນໃນວັນທີ 20 ທັນວາ 2017 ທີ່ ນະຄອນຫຼວງປັກກິ່ງ.
ອີກເທື່ອໜຶ່ງ ຕາງໜ້າ ພັກ-ລັດ ກໍຄືປະຊາຊົນລາວ ແລະ ປະຊາຊົນ 6 ປະເທດແມ່ນໍ້າຂອງ-ແມ່ນໍ້າລ້ານຊ້າງ ຂ້າພະ​ເຈົ້າ​ເຊື່ອ​ໝັ້ນ ​ແລະ ຝາກຄວາມຫວັງຢ່າງສູງ ທີ່ຢາກຈະເຫັນອົງການສື່ມວນຊົນ 6 ປະເທດພວກເຮົາ ປະຕິບັດບົດບາດ ທີ່ເປັນກະບອກສຽງສຳຄັນ ໃນການໂຄສະນາເຜີຍແຜ່ປະຊາສຳພັນ ດ້ວຍການລາຍງານຂ່າວ, ສະໜອງ​ຂໍ້​ມູນ​ຢ່າງຮອບດ້ານ, ​ແທດຕົວຈິງ, ຖືກຕ້ອງ, ພາວະວິໄສ ແລະ ທ່ຽງທຳ, ສ້າງສັນ, ສະເໝີພາບ, ຊ່ວຍເຫລືອເຊິ່ງກັນແລະກັນ ດ້ວຍຄວາມຈິງໃຈ ເໝືອນຄອບຄົວດຽວກັນ, ຊຸກຍູ້ສ້າງຄວາມເຂົ້າອົກ-ເຂົ້າໃຈ, ຄວາມໄວ້ເນື້ອເຊື່ອໃຈລະຫວ່າງປະຊາຊົນໃນພາກພື້ນນີ້, ມີການນໍາສະເໜີ ຫຼື ລາຍງານຂ່າວທີ່ດີ ກ່ຽວກັບການພົວພັນໄປມາຫາສູ່ກັນ ລະຫວ່າງ ປະຊາຊົນຂອງພວກເຮົາ, ການພັດທະນາເສດຖະກິດ ການຄ້າ ແລະ ການລົງທຶນຮ່ວມກັນ, ການສົ່ງເສີມການທ່ອງທ່ຽວ ທີ່ ຍືນຍົງ ແລະ ປະຊາຊົນມີສ່ວນຮ່ວມ ປະກອບສ່ວນຢ່າງຕັ້ງໜ້າ ​ເຂົ້າໃນການເສີມສ້າງສັນຕິພາບ-ມິດຕະພາບ, ພ້ອມກັນພັດທະນາປະເທດຂອງຕົນກ້າວໄປສູ່ ຄວາມຈະເລີນຮຸ່ງເຮືອງ ແລະ ຍືນຍົງ.
ໃນໂອກາດທີ່ມີຄວາມໝາຍນີ້, ຂ້າພະເຈົ້າ ຂໍສະແດງຄວາມ ຂອບໃຈມາຍັງບັນດາທ່ານແຂກທີ່ມີກຽດ, ເຈົ້າໜ້າທີ່ ລະດັບສູງຂອງອົງການສື່ມວນຊົນ ລວມທັງ ບັນດານັກຂ່າວສື່ມວນຊົນທຸກທ່ານ ທີ່ໄດ້ອອກແຮງປະກອບສ່ວນ ເຮັດໃຫ້ກອງປະຊຸມອັນມີຄວາມໝາຍທາງດ້ານປະຫວັດສາດນີ້ ໄດ້ເກີດຂື້ນໃນມື້ນີ້ ແລະ ຂໍອອຍພອນໃຫ້ທຸກທ່ານ ທ່ານຍິງ ທ່ານຊາຍ ຈົ່ງມີແຕ່ຄວາມສຸກ ມີສຸຂະພາບແຂງແຮງ ແລະ ສຸມສະຕິປັນຍາ ເພື່ອເຮັດໃຫ້ກອງປະຊຸມໄດ້ຮັບຜົນສຳເລັດ.
ຂໍອວຍພອນໃຫ້ກອງປະຊຸມຄັ້ງນີ້ ຈົ່ງປະສົບຜົນສຳເລັດຢ່າງຈົບງາມ.
ຂອບໃຈ!