ບົດປະກອບຄຳເຫັນຂອງ ຕາງໜ້າສື່ມວນຊົນລາວ
ຮຽນ ປະທານກອງປະຊຸມ ທີ່ນັບຖື!
ຮຽນ ບັນດາຜູ້ຕາງໜ້າເຈົ້າໜ້າທີ່ສື່ມວນຊົນ ອົງການສື່ມວນຊົນ 6 ປະເທດ ແມ່ນໍ້າຂອງ-ແມ່ນໍ້າລ້ານຊ້າງ, ບັນດາແຂກຜູ້ມີກຽດທຸກທ່ານທີ່ນັບຖື.

                ໃນນາມຕາງໜ້າອົງການສືື່ມວນຊົນລາວຂ້າພະເຈົ້າຮູ້ສຶກປິຕິຊົມຊື່ນ ແລະ ເປັນກຽດຢ່າງຍິ່ງທີ່ໄດ້ເຂົ້າຮ່ວມ ແລະ ປະກອບຄຳຄິດຄຳເຫັນໃນກອງປະຊຸມເວທີສົນທະນາທີ່ມີຄວາມໝາຍສຳຄັນຄັ້ງນີ້ ເຊິ່ງເປັນການສ້າງເງື່ອນໄຂໃຫ້ ສື່ມວນຊົນຈາກທັງ 6 ປະເທດແມ່ນໍ້າຂອງ-ແມ່ນໍ້າລ້ານຊ້າງພວກເຮົາໄດ້ມີໂອກາດພົບປະກັນ ສົນທະນາ ແລກປ່ຽນບົດຮຽນເຊິ່ງກັນແລະກັນ, ຊອກຊອ່ງທາງກຳນົດກົນໄກ ແລະ ທິດທາງຮ່ວມມືພັດທະນາວຽກງານສື່ສານມວນຊົນໃນພາກພື້ນນີ້ໃຫ້ຂະຫຍາຍຕົວຍິ່ງຂຶ້ນ.
ບັນດາທ່ານ ທ່ານຍິງແລະທ່ານຊາຍ ທີ່ຮັກແພງທັງຫລາຍ!
ກອງປະຊຸມສຸດຍອດສື່ມວນຊົນ ຂອບການຮ່ວມມື ແມ່ນໍ້າຂອງ-ແມ່ນໍ້າລ້ານຊ້າງ ພາຍໃຕ້ຫົວຂໍ້: “ ການຮ່ວມມືປະຊາຄົມ ແມ່ນ້ຳຂອງ-ແມ່ນ້ຳລ້ານຊ້າງ ເພື່ອອະນາຄົດອັນສະຫວ່າງສະໄຫວ”  ເຊິ່ງຖືເປັນຫົວຂໍ້ທີ່ເປັນບາດກ້າວອັນສຳຄັນ ສະໜັບສະໜູນ ແລະ ຊຸກຍູ້ການຮ່ວມມື ພັດທະນາສື່ມວນຊົນ ທັງ 6 ປະເທດແມ່ນໍ້ຂອງ-ແມ່ນໍ້າລ້ານຊ້າງ ຕາມເປົ້າໝາຍ ແລະ ຈຸດປະສົງຮ່ວມກັນເພື່ອເສີມສ້າງສັນຕິພາບ ແລະ ສະຖຽນລະພາບຂອງພາກພື້ນ, ຫຼຸດຜ່ອນຄວາມແຕກໂຕນກັນດ້ານການພັດທະນາ, ເພີ່ມທະວີການຮ່ວມມື ແລະ ຮ່ວມກັນສ້າງປະຊາຄົມຮ່ວມຊາຕາກຳຂອງປະເທດລຽບຕາມແມ່ນ້ຳຂອງ-ແມ່ນໍ້າລ້ານຊ້າງ ດ້ວຍ ການສ້າງຄວາມເຂົ້າອົກເຂົ້າໃຈກັນ, ສາມັກຄີຊ່ວຍເຫລືອ ເຊິ່ງກັນແລະກັນ, ເພີ່ມທະວີການປຶກສາຫາລື ແລະ ແລກປ່ຽນການພົວພັນຮ່ວມມືຢ່າງສະເໝີພາບ, ຕ່າງຝ່າຍຕ່າງໄດ້ຮັບຜົນປະໂຫຍດຮ່ວມກັນ”.
ຢາກເຮັດໃຫ້ ເປົ້າໝາຍ ແລະ ຈຸດປະສົງຮ່ວມກັນ ດັ່ງກ່າວ ບັນລຸຜົນສຳເລັດໄດ້ນັ້ນ, ອົງການສື່ມວນຊົນ ທັງ 6 ປະເທດພວກເຮົາມີຄວາມຈຳເປັນຕ້ອງໄດ້ ປຶກສາຫາລືຮ່ວມກັນໃນການນຳສະເໜີຂໍ້ມູນຂ່າວສານທີ່ຖືກຕ້ອງເປັນຄວາມຈິງ ແລະ ສ້າງສັນ ໃຫ້ ປະຊາຊົນໃນພາກພື້ນນີ້ໄດ້ຮັບຊາບ ດ້ວຍການເຂົ້າໄປມີບົດບາດໃນການນຳພາແນວຄິດຂອງປະຊາຊົນ ແນໃສ່ເພື່ອສ້າງຄວາມເຂົ້າໃຈ ແລະໄວ້ວາງ ໃຈເຊິ່ງກັນແລະກັນ, ພ້ອມກັນນຳໃຊ້ຜົນປະໂຫຍດແລະທ່າແຮງທີ່ມີຢ່າງຫຼວງຫຼາຍຮ່ວມກັນໃນອະນາ ຄົດ ບົນພື້ນຖານຮັດແໜ້ນການພົວພັນ ແລະ ຮ່ວມມືພັດທະນາຮ່ວມກັນໃນພາກພື້ນຂອງພວກເຮົາ  ໂດຍສະເພາະເລິ່ມຈາກການຮ່ວມກັນຊຸກຍູ້ ສົ່ງເສີມ ແລກປ່ຽນ  ແລະ ການໂຄສະນາ ວຽກງານທ່ອງທ່ຽວໃຫ້ກັນແລະ ກັນ.
ບັນດາທ່ານແຂກຜູ້ມີກຽດ!
ໃນປັດຈຸບັນ, ຍຸກໂລກາພິວັດ ຖືເປັນຍຸກແຫ່ງຂໍ້ມູນຂ່າວສານ ແລະ ເຕັກໂນໂລຊີ ທີ່ບໍ່ມີພົມແດນໄດ້ເຕີບໃຫຍ່ ແລະ ຂະຫຍາຍຕົວຢ່າງວ່ອງໄວ, ສະນັ້ນການກະຈາຍ ແລະ ໄດ້ຮັບ ຂໍ້ມູນຂ່າວສານ ມີຫຼາຍຮູບການ ແລະ ຫຼາຍຊ່ອງທາງ, ແຕ່ສໍາລັບປະເທດທີ່ຍັງທຸກຍາກ ແລະ ດ້ອຍພັດທະນາ ແມ່ນຍັງມີຂີດຈຳກັດທາງດ້ານງົບປະມານ ຈຶ່ງບໍ່ສາມາດນຳໃຊ້ ພາຫະນະຫຼື ອຸປະກອນວິຊາການສື່ມວນຊົນ ທີ່ມີເຕັກໂນໂລຊີສູງ ແລະ ລາຄາແພງໃນການກະຈາຍຂໍ້ມູນຂ່າວສານຢ່າງມີປະສິດທິຜົນ ແລະ ວ່ອງໄວອອກສູ່ສັງຄົມ ແລະ ໂລກໄດ້.
ທ່ານຍິ່ງ ແລະ ທ່ານຊາຍຜູ້ມີກຽດທັງຫລາຍ!
ເພື່ອເຮັດໃຫ້ບັນຫາທ້າທາຍ ດັ່ງກ່າວໃຫ້ຫລຸດໜ້ອຍລົງເທື່ອລະກ້າວນັ້ນ ຂ້າພະເຈົ້າຈຶ່ງສະເໜີຕໍ່ກອງປະຊຸມຄັ້ງນີ້ວ່າ :

  1. ເຫັນສົມຄວນໃຫ້ມີເວທີສົນທະນາ ປຶກສາຫາລື ການຮ່ວມມື ດ້ານຂໍ້ມູນຂ່າວສານ ແລະ ເຕັກໂນໂລຊີໃໝ່ໆ
  2. ເຫັນສົມຄວນໃຫ້ມີການແລກປ່ຽນ ບົດຂ່າວຕ່າງໆ ລະຫວ່າງບັນດາປະເທດ ແມ່ນ້ຳຂອງ-ແມ່ນໍ້າລ້ານຊ້າງໂດຍບໍ່ເສຍຄ່າ.
  3. ສະເໜີໃຫ້ ອົງການສື່ມວນຊົນ ສປ ຈີນໃຫ້ການຊ່ວຍເຫຼືອ ການພັດທະນາວຽກງານສື່ມວນຊົນ ຊຶ່ງລວມມີການກໍ່ສ້າງບຸກຄະລະກອນ,ອຸປະກອນເຕັກໂນໂລຊີ ຂໍ້ມູນຂ່າວສານ ເພື່ອຮັບໃຊ້ວຽກງານສື່ ໃຫ້ສາມາດທຽບທັນກັບບັນດາປະເທດ ໃນຂົງເຂດພາກພື້ນແລະໃນໂລກ ໃຫ້ແກ່ບັນດາປະເທດທີ່ຍັງທຸກຍາກໃນພາກພື້ນຂອງພວກເຮົາ.

 ສຸດທ້າຍນີ້ຂ້າພະເຈົ້າຂໍອວຍພອນໃຫ້ ບັນດາທ່ານ ຜູ້ ແທນທັງຫລາຍ ຈົ່ງມີແຕ່ຄວາມສຸກ, ມີ ສຸຂະພາບເຂັ້ມແຂງ, ຂໍອວຍພອນໃຫ້ກອງປະຊຸມປະສົບຜົນສຳເລັດຢ່າງຈົບງາມ.
ຂໍຂອບໃຈ!