ໂຄງການ GAMCIL 2023-2024

 ກອງປະຊຸມຜູ້ປະສານງານໂຄງການ ທີ່ ແຂວງ ຫຼວງພະບາງ

ໃນວັນທີ 20-21 ທັນວາ 2023, ໂຄງການ ສ້າງຄວາມເຂັ້ມແຂງໃຫ້ແກ່ ສື່ມວນຊົນ ໂດຍການມີສ່ວນຮ່ວມຂອງ ອົງການຈັດຕັ້ງມະຫາຊົນ ແລະ ອົງການຈັດຕັ້ງ ທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL) ໄດ້ຈັດກອງປະຊຸມຜູ້ປະສານງານໂຄງການ ທີ່ແຂວງ ຫຼວງພະບາງ. ພາຍໃນກອງປະຊຸມໄດ້ສົນທະນາກ່ຽວກັບ ພາບລວມຂອງໂຄງການສະເພາະໃນແຂວງພື້ນທີ່ເປົ້າໝາຍ, ການແນະນຳຮູບແບບຂອດການປະສານງານ ແລະ ການຮ່ວມມືກັນ ເພື່ອເຮັດໃຫ້ໂຄງການສາມາດຈັດຕັ້ງປະຕິບັດໄດ້ຢ່າງມີປະສິດຕິພາບ. ນອກຈາກນັ້ນ ພາຍໃນກອງປະຊຸມຍັງໄດ້ເວົ້າເຖິງແຜນການດຳເນີນກິດຈະກຳຂອງໂຄງການທີ່ຈະເລີ່ມຈັດຕັ້ງປະຕິບັດໃນ 6 ເດືອນຕໍ່ໜ້າ ເພື່ອຮັບປະກັນໃຫ້ກິດຈະກຳສາມາດຈັດຕັ້ງປະຕິບັດໄດ້ຕາມເວລາທີ່ກຳນົດ. 

ກອງປະຊຸມຜູ້ປະສານງານໂຄງການ ທີ່ ນະຄອນຫຼວງວຽງຈັນ

ໃນວັນທີ 18 ທັນວາ 2023, ໂຄງການ ສ້າງຄວາມເຂັ້ມແຂງໃຫ້ແກ່ ສື່ມວນຊົນ ໂດຍການມີສ່ວນຮ່ວມຂອງ ອົງການຈັດຕັ້ງມະຫາຊົນ ແລະ ອົງການຈັດຕັ້ງ ທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL) ໄດ້ຈັດກອງປະຊຸມຜູ້ປະສານງານໂຄງການ ທີ່ນະຄອນຫຼວງວຽງຈັນ. ພາຍໃນກອງປະຊຸມໄດ້ສົນທະນາກ່ຽວກັບ ພາບລວມຂອງການຈັດຕັ້ງປະຕິບັດກິດຈະກຳຂອງໂຄງການ, ການແນະນຳ ຮູບແບບການນໍາໃຊ້ສື່ສັງຄົມໃນ ສປປ ລາວ ໂດຍສະເພາະແມ່ນນັກຂ່າວລາວ ແລະ ບັນດາສື່ຕ່າງໆ. ສະມາຄົມນັກຂ່າວແຫ່ງ ສປປ ລາວ ຈະໄດ້ດໍາເນີນການວິເຄາະທາງດ້ານສື່ມວນຊົນ ເພື່ອກໍານົດວິທີການທີ່ດີທີ່ສຸດທີ່ຈະເຂົ້າເຖິງກຸ່ມເປົ້າໝາຍ ແລະ ກຸ່ມຄົນທົ່ວໄປ ທີ່ນໍາໃຊ້ສື່ສັງຄົມອອນລາຍ ເຊິ່ງສິ່ງນີ້ຈະຊ່ວຍໃຫ້ໂຄງການ ສາມາດຫາວິທີແກ້ໄຂສິ່ງທ້າທາຍ ແລະ ຊ່ວຍໃຫ້ຜູ້ນຳໃຊ້ສື່ສັງຄົມອອນລາຍທົ່ວໄປບໍລິໂພກສື່ໄດ້ຢ່າງທົ່ວເຖິງ ໂດຍສະເພາະແມ່ນ ຂໍ້ມູນຂ່າວສານກ່ຽວກັບການພັດທະນາສີຂຽວແບບຍືນຍົງ.

ພິທີ ເຊັນບົດບັນທຶກຄວາມເຂົ້າໃຈໂຄງການ GAMCIL

ວັນທີ 14 ກັນຍາ 2023, ໄດ້ມີພິທີ ລົງນາມເຊັນບົດບັນທຶກຄວາມເຂົ້າໃຈ ຂອງໂຄງການ ສ້າງຄວາມເຂັ້ມແຂງໃຫ້ແກ່ ສື່ມວນຊົນ ໂດຍການມີສ່ວນຮ່ວມຂອງ ອົງການຈັດຕັ້ງມະຫາຊົນ ແລະ ອົງການຈັດຕັ້ງ ທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL) ລະຫວ່າງ ອົງການແຄຣ໌ ນານາຊາດ ປະຈຳ ສປປ ລາວ ແລະ ກະຊວງ ຖະແຫຼງຂ່າວ, ວັດທະນາທຳ ແລະ ທ່ອງທ່ຽວ. ເປັນກຽດເຂົ້າຮ່ວມງານໂດຍມີທ່ານ ສົມສະຫວາດ ພົງສາ, ຫົວໜ້າກົມສື່ມວນຊົນ ຕາງໜ້າໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ນາງ ແກ້ວອຳພອນ ສຸວັນນະພູມ, ຜູ້ອຳນວຍການ ອົງການແຄຣ໌ ນານາຊາດ ປະຈຳ ສປປ ລາວ, ທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວ ແຫ່ງ ສປປ ລາວ, ອະດີດຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ນາງ ອີນາ ມາຊິວລີໂອນີແຕ, ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ ແລະ ຍັງມີບັນດາທ່ານຕາງໜ້າຈາກພາກລັດຖະບານ, ກະຊວງ, ຂັ້ນແຂວງ, ຂັ້ນເມືອງ ແລະ ລວມທັງ ບັນດາທ່ານຈາກພື້ນທີ່ເປົ້າໝາຍຂອງໂຄງການ.
ດ້ວຍການສະໜັບສະໜູນທຶນໂດຍ ສະຫະພາບ ເອີຣົບ ໂຄງການດັ່ງກ່າວ ຈະສົ່ງເສີມຄວາມຮ່ວມມືກັບຄູ່ຮ່ວມພັດທະນາ ເຊັ່ນ: ກົມສື່ມວນຊົນ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງຕາງໜ້າໂດຍ ສະມະຄົມນັກຂ່າວ ແຫ່ງ ສປປ ລາວ ໃນການຍົກລະດັບທັກສະດ້ານວິຊາຊີບ ລວມທັງການນຳໃຊ້ເຕັກໂນໂລຊີແບບດີຈິຕອນ ແລະ ສື່ແບບໃໝ່ ເພື່ອຊ່ວຍໃຫ້ປະຊາຊົນໄດ້ຮັບຂໍ້ມູນຂ່າວສານທີ່ມີຄຸນະພາບ ໂດຍຜ່ານການລາຍງານທີ່ມີຄວາມຮັບຜິດຊອບ ແລະ ເປັນມືອາຊີບ ກ່ຽວກັບການພັດທະນາສີຂຽວ ແລະ ເພື່ອເຮັດໃຫ້ບັນດາຜູ້ເຂົ້າຮ່ວມຈາກພາກສັງຄົມ ໄດ້ຍົກລະດັບຄວາມຮູ້ ແລະ ຄວາມສາມາດ ຂອງຕົນເອງໃນການປະກອບສ່ວນສ້າງນະໂຍບາຍ, ຕິດຕາມ ແລະ ຊຸກຍູ້ ວຽກງານການພັດທະນາສີຂຽວທີ່ມີຜົນກະທົບຕໍ່ຊຸມຊົນ, ລວມທັງການນຳໃຊ້ເຕັກໂນໂລຊີດີຈິຕອນ ແລະ ສື່ແບບໃໝ່ຢ່າງສ້າງສັນ.

ກອງປະຊຸມພົບປະ ລະຫວ່າງ ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣ໌ ນານາຊາດ ປະຈຳ ສປປ ລາວ

ໃນວັນທີ 10 ພຶດສະພາ 2023, ສະມາຄົມນັກຂ່າວ ແຫ່ງ ສປປ ລາວ ໄດ້ຈັດກອງປະຊຸມພົບປະ ກັບອົງການແຄຣ໌ ນານາຊາດ ປະຈຳ ສປປ ລາວ ທີ່ ນະຄອນຫຼວງວຽງຈັນ. ໂດຍມີ ທ່ານ ສະຫວັນຄອນ ຣາຊມຸນຕຣີ, ປະທານ ສະມາຄົມນັກຂ່າວ ແຫ່ງ ສປປ ລາວ ແລະ ທ່ານ ນາງ ແກ້ວອຳພອນ ສຸວັນນະພູມ, ຜູ້ອຳນວຍການ  ອົງການແຄຣ໌ ນານາຊາດ ປະຈຳ ສປປ ລາວ, ຕາງໜ້າ ຈາກບັນກະຊວງ, ກົມ ແລະ ຄະນະກໍາມະການຄຸ້ມຄອງການປະຕິບັດຂອງໂຄງການ ສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມ ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL). ພາຍໃນກອງປະຊຸມພົບປະ ໄດ້ມີການແນະນຳພາລະບົດບາດກ່ຽວກັບໜ້າທີຮັບຜິດຊອບຂອງ ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣ໌ ລາວ ເພື່ອໃຫ້ມີຄວາມເຂົ້າໃຈຫຼາຍຂື້ນຕໍ່ກັບບົດບາດຂອງແຕ່ລະພາກສ່ວນ. ນອກຈາກນັ້ນ, ກໍຍັງໄດ້ມີການໂອ້ລົມກ່ຽວກັບຄວາມຄືບໜ້າທາງດ້ານເນື້ອໃນຂອງບົດບັນທຶກຄວາມເຂົ້າໃຈ ແລະ ຮ່ວມກັນປະກອບຄຳຄິດເຫັນເພື່ອເຮັດໃຫ້ເນື້ອໃນມີຄວາມລະອຽດຫຼາຍຂື້ນ.

ກອງປະຊຸມ ປຶກສາຫາລືກ່ຽວກັບເນື້ອໃນບົດບັນທຶກຄວາມເຂົ້າໃຈ ຂອງໂຄງການ GAMCIL

ໃນວັນທີ 10 ກຸມພາ 2023, ສະມາຄົມນັກຂ່າວ ແຫ່ງ ສປປ ລາວ ໄດ້ຈັດກອງປະຊຸມ ປຶກສາຫາລືກ່ຽວກັບເນື້ອໃນບົດບັນທຶກຄວາມເຂົ້າໃຈ ຂອງໂຄງການ ສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມ ຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວ ໃນ ສປປ ລາວ (GAMCIL). ໂດຍມີ ທ່ານ ສະຫວັນຄອນ ຣາຊມຸນຕຣີ, ປະທານ ສະມາຄົມນັກຂ່າວ ແຫ່ງ ສປປ ລາວ ແລະ ທ່ານ ນາງ ແກ້ວອຳພອນ ສຸວັນນະພູມ, ຜູ້ອຳນວຍການ  ອົງການແຄຣ໌ ນານາຊາດ ປະຈຳ ສປປ ລາວ, ທ່ານ ສົມສະຫວາດ ພົງສາ ຫົວໜ້າ ກົມສື່ມວນຊົນ, ຕາງໜ້າ ຈາກກົມຈັດຕັ້ງສາກົນ ກະຊວງການຕ່າງປະເທດ, ບັນດາທ່ານຫົວໜ້າ, ຮອງຫົວໜ້າ ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ພະແນກການຕ່າງປະເທດ ນະຄອນຫຼວງວຽງຈັນ, ແຂວງ ຫຼວງພະບາງ ແລະ ແຂວງ ຈໍາປາສັກ ທີ່ຫ້ອງປະຊຸມ ໜັງສືພິມວຽງຈັນທາຍ. ພາຍໃນກອງປະຊຸມໄດ້ມີການປຶກສາຫາລື ລາຍລະອຽດຂອງບົດບັນທຶກຄວາມເຂົ້າໃຈ ລວມທັງພື້ນທີ່ເປົ້າໝາຍຂອງໂຄງການ, ງົບປະມານ, ພາລະບົດບາດ ແລະ ຄວາມຮັບຜິດຊອບ ຂອງຄະນະກໍາມະການຄຸ້ມຄອງການປະຕິບັດຂອງໂຄງການ.

ກອງປະຊຸມພົບປະ ເພື່ອປຶກສາຫາລືກ່ຽວກັບໂຄງການ GAMCIL ລະຫວ່າງ ສະມາຄົມນັກຂ່າວ ແຫ່ງ ສປປ ລາວ ແລະ ສະຫະພາບ ເອີຣົບ ປະຈຳ ສປປ ລາວ

ໃນວັນທີ 20 ເມສາ 2022 ທີ່ຜ່ານມາ, ທ່ານ ສະຫວັນຄອນ ຣາຊມຸນຕຣີ, ປະທານສະມາຄົມນັກຂ່າວ ແຫ່ງ ສປປ ລາວ ໄດ້ຕ້ອນຮັບ ແລະ ພົບປະ ທ່ານ ນາງ ອີນາ ມາຈູລີໂອນີແຕ, ເອກອັກຄະລັດຖະທູດ ສະຫະພາບເອີຣົບ ປະຈຳ ສປປ ລາວ ພ້ອມຄະນະ. ຈຸດປະສົງໃນການພົບປະໃນຄັ້ງນີ້ ກໍແມ່ນ ເພື່ອເປັນການສ້າງຄວາມຮ່ວມມືກັນ ໃນການສຶກສາຄວາມເປັນໄປໄດ້ຕໍ່ກັບ ການຈັດຕັ້ງປະຕິບັດໂຄງການ GAMCIL ໂດຍການມີສ່ວນຮ່ວມຂອງ ສື່ມວນຊົນລາວ ກໍຄື ສະມາຄົມນັກຂ່າວ ແຫ່ງ ສປປ ລາວ, ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.