ໂຄງການ GAMCIL 2024-2025

ການຈັດຊຸດຝຶກອົບຮົມຄູຝຶກ “ການລາຍງານຂ່າວບັນຫາສີຂຽວ” ໃຫ້ແກ່ນັກຂ່າວ ໃນວັນທີ 14 – 18 ຕຸລາ 2024 ທີ່ ນະຄອນຫຼວງວຽງຈັນ.

ໃນວັນທີ 14 – 18 ຕຸລາ 2024 ສະມາຄົມນັກຂ່າວ ແຫ່ງ ສປປ ລາວ ແລະ ອົງການແຄຣ໌ ລາວ ໄດ້ຈັດຊຸດຝຶກອົບຮົມຄູຝຶກ ຫົວຂໍ້ “ການລາຍງານຂ່າວບັນຫາສີຂຽວ” ໃຫ້ແກ່ ນັກຂ່າວ ພາຍໃຕ້ໂຄງການ ສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວ ໃນ ສປປ ລາວ ທີ່ ນະຄອນຫຼວງວຽງຈັນ. ພາຍໃນງານເປັນກຽດເຂົ້າຮ່ວມເປັນປະທານໂດຍ ທ່ານ ສະຫວັນຄອນ ຣາຊມຸນຕຣີ, ປະທານ ສະມາຄົມນັກຂ່າວ ແຫ່ງ ສປປ ລາວ, ອະດີດ ຮອງລັດຖະມົນຕີ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ຕາງໜ້າຜູ້ເຂົ້າຮ່ວມຊຸດຝຶກອົບຮົມຄູຝຶກຈາກ ບັນດາກະຊວງ, ບັນກາກົມ ແລະ ບັນດາພະແນກ ພ້ອມທັງ 3 ອົງການຈັດຕັ້ງປະຫາຊົນ ແລະ ອົງການຈັດຕັ້ງສັງຄົມ. ຈຸດປະສົງຂອງການຝຶກອົບຮົມ ແມ່ນເພື່ອເປັນການສ້າງຄວາມອາດສາມາດໃນການເປັນຄູຝຶກ ໃນວຽກງານການລາຍງານຂ່າວສີຂຽວ ໃຫ້ແກ່ນັກຂ່າວລາວ ໂດຍສະເພາະແມ່ນ ການໃຫ້ຄວາມຮູ້ກ່ຽວກັບການປ່ຽນແປງດິນຟ້າອາກາດ, ການຄົ້ນຫາຂໍ້ມູນເພື່ອຂຽນຂ່າວ, ທັກສະການເລົ່າເລື່ຶອງໃຫ້ໜ້າສົນໃຈ, ການນຳໃຊ້ເຄື່ອງມືດິຈີຕອນ ເຂົ້າມາຊ່ວຍໃນການລາຍງານຂ່າວ. ພາຍຫຼັງ ທີ່ສຳເລັດຊຸດຝຶກອົບຮົມຄູຝຶກແລ້ວ ພວກເຂົາຈະໄດ້ນຳເອົາບົດຮຽນທີ່ໄດ້ຮຽນມາ ໄປສອນຕໍ່ໃຫ້ກັບສື່ມວນຊົນ ໃນພື້ນທີ່ເປົ້າໝາຍຂອງໂຄງການ ເພື່ອຮັບປະກັນວ່າ ບົດຮຽນດັ່ງກ່າວ ຈະຊ່ວຍເສີມສ້າງຄວາມອາດສາມາດໃຫ້ພວກເຂົາສາມາດລາຍງານຂ່າວບັນຫາສີຂຽວ ໄດ້ຢ່າງເປັນມືອາຊີບ.

ໃນມື້ນີ້ໄດ້ມີພິທີສະຫລຸບກິດຈະກຳ 6 ເດືອນຕົ້ນປີ ແລະ ສະເໜີແຜນການ 6 ເດືອນ ທ້າຍປີ ຂອງໂຄງການ GAMCIL

ວັນທີ 29 ສິງຫາ 2024 ທີ່ຜ່ານມາ, ອົງການແຄຣ໌ ລາວ ຮ່ວມກັບ ສະມາຄົມນັກຂ່າວແຫ່ງ ສປປ ລາວ ໄດ້ຈັດກອງປະຊຸມ ສະຫຼຸບ 6 ເດືອນຕົ້ນປີ ແລະ ວາງແຜນການ 6 ເດືອນ ທ້າຍປີ ຂອງໂຄງການ ສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອການພັດທະນາສີຂຽວ ໃນ ສປປ ລາວ ທີ່ນະຄອນຫຼວງວຽງຈັນ, ເປັນກຽດເຂົ້າຮ່ວມເປັນປະທານພາຍໃນກອງປະຊຸມ ໂດຍ ທ່ານ ໂພສີ ແກ້ວມະນີວົງ, ຮອງລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ສະຫວັນຄອນ ຣາຊມຸນຕຣີ, ປະທານ ສະມາຄົມນັກຂ່າວ ແຫ່ງ ສປປ ລາວ, ອະດີດ ຮອງລັດຖະມົນຕີ ກະຊວງ ຖະແຫຼງຂ່າວ, ທ່ອງທ່ຽວ ແລະ ວັດທະນະທຳ, ທ່ານ ປອ ອາຈິດ ປາຣິດາ, ຜູ້ອຳນວຍການດ້ານແຜນງານ, ອົງການແຄຣ໌ ນານາຊາດ ປະຈຳ ສປປ ລາວ. ນອກຈາກນັ້ນ, ຍັງມີຕາງໜ້າຈາກບັນດາກະຊວງ, ບັນດາກົມທີ່ກ່ຽວຂ້ອງ, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງ ຫຼວງພະບາງ ແລະ ແຂວງ ຈຳປາສັກ, 3 ອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ ແລະ ຜູ້ນໍາສື່ມວນຊົນຈາກຫຼາຍພາກສ່ວນ ທີ່ໄດ້ເຂົ້າຮ່ວມໃນກອງປະຊຸມດັ່ງກ່າວ. ກອງປະຊຸມແມ່ນໄດ້ມີການສະຫຼຸບ ແລະ ລາຍງານກ່ຽວກັບການຈັດຕັ້ງປະຕິບັດວຽກງານຂອງໂຄງການ ໃນ 3 ແຂວງເປົ້າໝາຍກໍຄື ນະຄອນຫຼວງວຽງຈັນ, ແຂວງ ຫຼວງພະບາງ ແລະ ແຂວງ ຈຳປາສັກ. ນອກຈາກນັ້ນ, ພາຍໃນງານກໍຍັງໄດ້ມີການສົນທະນາ ແລະ ແລກປ່ຽນຄຳຄິດເຫັນຮ່ວມກັນ ເພື່ອວາງແຜນການຈັດຕັ້ງປະຕິບັດກິດຈະກຳໃນອີກ 6 ເດືອນຕໍ່ໜ້າ ໃຫ້ມີຄວາມແທດເໝາະ ແລະ ບັນລຸຕາມແຜນກິດຈະກຳຂອງໂຄງການ.

ການປະເມີນຄວາມຕ້ອງການຝຶກອົບຮົມ ຂອງນັກຂ່າວ

ໃນວັນທີ 5-7 ສິງຫາ 2024, ສະມາຄົມນັກຂ່າວ ແຫ່ງ ສປປ ລາວ, ອົງການແຄຣ໌ ລາວ, ໂຄງການ ແກມຊິວ ແລະ ຊ່ຽວຊານ ໄດ້ຈັດກອງປະຊຸມ ການປະເມີນຄວາມຕ້ອງການຝຶກອົບຮົມແບບເຊິ່ງໜ້າ ຢູ່ທີ່ ນະຄອນຫຼວງວຽງຈັນ ແລະ ແຂວງ ຫຼວງພະບາງ ໂດຍມີຜູ້ເຂົ້າຮ່ວມ 58 ທ່ານ ແລະ ໄດ້ເຮັດການປະເມີນແບບອອນລາຍ ທີ່ແຂວງ ຈຳປາສັກ ໂດຍມີຜູ້ເຂົ້າຮ່ວມການປະເມີນ 30 ທ່ານ. ຈຸດປະສົງກໍແມ່ນເພື່ອ ປະເມີນຄວາມຕ້ອງການການຝຶກອົບຮົມຂອງນັກຂ່າວລາວ, ສະໜອງຂໍ້ມູນກ່ຽວກັບຄວາມຕ້ອງການ ການຝຶກອົບຮົມ ແລະ ການນຳໃຊ້ຂໍ້ມູນຂ່າວສານ ເພື່ອພັດທະນາຫຼັກສູດໃຫ້ແທດເໝາະກັບຄວາມຕ້ອງການຕົວຈິງ ຂອງນັກຂ່າວລາວ. ພາຍຫຼັງທີ່ສຳເລັດການປະເມີນແລ້ວ, ສະມາຄົມນັກຂ່າວ ແຫ່ງ ສປປ ລາວ, ອົງການແຄຣ໌ ລາວ, ໂຄງການ ແກມຊິວ ແລະ ຊ່ຽວຊານ ກໍໄດ້ເຮັດວຽກຮ່ວມກັນ ເພື່ອສ້າງແລະ ພັດທະນາຫຼັກສູດ ການຮຽນການສອນ ທີ່ເໝາະສົມທັງຮູບແບບເຊິ່ງໜ້າ ແລະ ແບບອອນລາຍ ຜ່ານເວັບໄຊ ຂອງສະມາຄົມນັກຂ່າວ ແຫ່ງ ສປປ ລາວ. ພ້ອມກັນນັ້ນ, ຫຼັກສູດດັ່ງກ່າວກໍຈະໄດ້ຖືກເອົາມາຝຶກອົບຮົມໃຫ້ແກ່ນັກຂ່າວລາວ ເພື່ອຊ່ວຍເພີ່ມຄວາມຮັບຮູ້ທາງດ້ານສື່ດິຈິຕອນ ແລະ ເພີ່ມການເຂົ້າເຖິງຂໍ້ມູນຂ່າວສານ ການພັດທະນາທີ່ກ່ຽວຂ້ອງກັບບົດບາດທາງເພດ ແລະ ການພັດທະນາສີຂຽວ.

ສະເຫຼີມສະຫຼອງ ວັນສື່ມວນຊົນລາວ ຄົບຮອບ 74 ປີ 

ໃນວັນທີ 2 ສິງຫາ 2024, ອົງການແຄຣ໌ ລາວ ແລະ ໂຄງການ ແກມຊິວ ໄດ້ເຂົ້າຮ່ວມ ພິທີສະເຫຼີມສະຫຼອງ ວັນສື່ມວນຊົນລາວ ຄົບຮອບ 74 ປີ ໃນຫົວຂໍ້ “ການນຳໃຊ້ປັນຍາປະດິດ ແລະ ສິ່ງທ້າທາຍຂອງສື່ສັງຄົມອອນລາຍສຳລັບສື່ມວນຊົນລາວ” ເຊິ່ງຈັດໂດຍ ສະມາຄົມນັກຂ່າວ ແຫ່ງ ສປປ ລາວ ທີ່ ນະຄອນຫຼວງວຽງຈັນ ໂດຍມີຜູ້ເຂົ້າຮ່ວມໃນພິທີສະເຫຼີມສະຫຼອງ ທັງຮູບແບບເຊິ່ງໜ້າ ແລະ ອອນລາຍ ຫຼາຍກວ່າ 200 ທ່ານ ໃນທົ່ວປະເທດ. ພາຍໃນງານໄດ້ມີການສົນທະນາໃນຫົວຂໍ້ “ການນໍາໃຊ້ ປັນຍາປະດິດ ຊ່ວຍສື່ມວນຊົນ; ການນໍາໃຊ້ ປັນຍາປະດິດ ເຂົ້າໃນວຽກງານຂ່າວ ແລະ ຈັນຍາບັນ; ວິທີນໍາໃຊ້ຄຸນປະໂຫຍດ ແລະ ຄວາມປອດໄພການໃຊ້ສື່ສັງຄົມອອນລາຍ; ແລະ ຄວາມສຳຄັນຂອງການພັດທະນາຍືນຍົງສີຂຽວ.” ສະນັ້ນ, ເພື່ອຊ່ວຍໃຫ້ນັກຂ່າວລາວ ສາມາດນຳໃຊ້ເຄື່ອງມືເຕັກໂນໂລຊີ ເຂົ້າໃນການຜະລິດສື່ດິຈີຕອນ, ສະມາຄົມນັກຂ່າວ ແຫ່ງ ສປປ ລາວ, ອົງການແຄຣ໌ ແລະ ໂຄງການ ແກມຊິວ ຈຶ່ງໄດ້ເຮັດວຽກຮ່ວມກັບຫຼາຍໆພາກສ່ວນທີ່ກ່ຽວຂ້ອງ ໂດຍສະເພາະນັກຂ່າວລາວ ໃນການສະໜັບສະໜູນການແກ້ໄຂຊ່ອງວາງ ດ້ານຄວາມຮູ້ທາງສື່ສັງຄົມ, ປັບປຸງການຮັບຮູ້ທາງດ້ານສື່ດິຈີຕອນ ເພື່ອເພີ່ມການເຂົ້າເຖິງຂໍ້ມູນຂ່າວສານ ການພັດທະນາທີ່ກ່ຽວຂ້ອງກັບບົດບາດທາງເພດ ແລະ ການພັດທະນາສີຂຽວ.

ການເກັບຂໍ້ມູນເບື້ອງຕົ້ນ ຂອງໂຄງການ

ໃນລະຫວ່າງວັນທີ 13-27 ມິຖຸນາ 2024, ສະມາຄົມນັກຂ່າວ ແຫ່ງ ສປປ ລາວ, ອົງການແຄຣ໌ ລາວ ແລະ ໂຄງການ ແກມຊິວ ໄດ້ມີການເກັບກຳຂໍ້ມູນເບື້ອງຕົ້ນ ຂອງໂຄງການ ຢູ່ທີ່ ນະຄອນຫຼວງວຽງຈັນ, ແຂວງ ຫຼວງພະບາງ ແລະ ແຂວງ ຈຳປາສັກ ເຊິ່ງມີຜູ້ເຂົ້າຮ່ວມທັງໝົດ 67 ທ່ານ, ແບບເຊິ່ງໜ້າ 54 ທ່ານ ແລະ ແບບອອນລາຍ 13 ທ່ານ ໂດຍທີ່ຜູ້ເຂົ້າຮ່ວມຕອບແບບສອບຖາມ ແມ່ນມາຈາກຫຼາຍພາກສ່ວນເຊັນ ຄູ່ຮ່ວມງານນັກຂ່າວພາກລັດ, ພາກສື່ສັງຄົມ, ຜູ້ນຳໃຊ້ສື່ສັງຄົມອອນລາຍທົ່ວໄປ ແລະ ຜູ້ສ້າງວິດີໂອ ແລະ ຮູບເງົາ. ໂຄງການແມ່ນໄດ້ນຳໃຊ້ແບບສອບຖາມທັງໝົດ 3 ແບບ ທີ່ສ້າງຈາກເຄື່ອງມື ໂຄໂບ້ທູບ໋ອກ (KOBO Toolbox). ການເກັບກຳຂໍ້ມູນໃນຄັ້ງນີ້ ໄດ້ຊ່ວຍໃຫ້ໂຄງການສາມາດກຳນົດຂອບເຂດບູລິມະສິດຂອງໂຄງການ, ເຂົ້າໃຈໃນຜົນກະທົບຂອງໂຄງການ, ສາມາດບັດທຶກຕົວຊີ້ວັດທີ່ສຳຄັນ, ເພື່ອເປັນຂໍ້ມູນເບື້ອງຕົ້ນໃນການຕິດຕາມ ແລະ ປະເມີນຄວາມຄືບໜ້າ ແລະ ປະສິດທິຜົນໃນລະຫວ່າງການຈັດຕັ້ງປະຕິບັດ ແລະ ສິ້ນສຸດໂຄງການ.

ກອງປະຊຸມຜູ້ປະສານງານໂຄງການຂັ້ນແຂວງ

ໃນລະຫວ່າງວັນທີ 13-27 ມິຖຸນາ 2024, ສະມາຄົມນັກຂ່າວ ແຫ່ງ ສປປ ລາວ, ອົງການແຄຣ໌ ລາວ ແລະ ໂຄງການ ແກມຊິວ ໄດ້ຈັດກອງປະຊຸມຜູ້ປະສານງານຂັ້ນແຂວງຢູ່ ນະຄອນຫຼວງວຽງຈັນ, ແຂວງ ຫຼວງພະບາງ ແລະ ແຂວງ ຈຳປາສັກ ເຊິ່ງມີຜູ້ເຂົ້າຮ່ວມທັງໝົດ 20 ທ່ານ. ຈຸດປະສົງໃນການຈັດກອງປະຊຸມໃນຄັ້ງນີ້ ກໍແມ່ນເພື່ອ ເປັນການພົບປະກັບຄູ່ຮ່ວມງານຫຼັກປະຈຳແຕ່ລະແຂວງ ຂອງໂຄງການ ເພື່ອຮ່ວມກັນແລກປ່ຽນ ແລະ ຖອດຖອນບົດຮຽນກ່ຽວກັບການຈັດຕັ້ງປະຕິບັດກິດຈະກຳໃນໄລຍະທີ່ຜ່ານມາ, ລາຍງານຜົນສຳເລັດ ແລະ ສິ່ງທ້າທາຍຕໍ່ກັບການຈັດຕັ້ງປະຕິບັດກິດຈະກຳ ຂອງໂຄງການ ແລະ ລາຍງານແຜນການຈັດຕັ້ງປະຕິບັດກິດຈະກຳຂອງໂຄງການ ທີ່ຈະເຮັດຮ່ວມກັນໃນປີທີຕໍ່ໄປ. ພ້ອມດຽວກັນນັ້ນ ທາງຄະນະກໍ່ຍັງໄດ້ປຶກສາຫາລື ເພື່ອຄົ້ນຄ້ວາເພື່ອແຕ່ງຕັ້ງ ຕາງໜ້າຜູ້ປະສານງານຫຼັກ ຂອງໂຄງການ ປະຈຳແຕ່ລະແຂວງ ເພື່ອໃຫ້ບັນດາທ່ານສາມາດສະໜັບສະໜູນດ້ານການປະສານງານ ແລະ ຈັດຕັ້ງປະຕິບັດກິດຈະກຳ ຮ່ວມກັບໂຄງການໃນຕະຫຼອດໄລຍະເວລາຂອງໂຄງການ.